Ülviyyət soraqlı poeziya

YAZIÇILAR BİRLİYİNDƏ ŞAİR ZİRƏDDİN QAFARLININ YENİ KİTABININ TƏQDİMATI OLUB

İstedadlı şair Zirəddin Qafarlı ədəbiyyata keçən əsrin 80-ci illərində gəlib və özünün ilk şeirləri ilə Azərbaycan oxucusunun qəlbinə yol tapa bilib. Buna özünün istedadı, Azərbaycan folkloruna, xalq dilinə, el yaddaşına dərin bələdçiliyi ilə nail olub. O, eyni zamanda, Moskvada Ədəbiyyat İnstitutunda təhsil aldığı illərdə rus və dünya ədəbiyyatına dərindən bələd olub və bununla da özünün seçilən yaradıcılıq yolunu müəyyənləşdirməkdə çətinlik çəkməyib. İndi Zirəddin Qafarlı imzası Azərbaycan ədəbi ictimaiyyətinə, geniş auditoriyaya kifayət qədər tanışdır. Onun xalq poeziyası ənənələrindən qaynaqlanan şeirlərini oxucular hər zaman maraqla qarşılayır, oxuyur, sevirlər.

Bu və buna bənzər digər fikirlər şair Z.Qafarlının "Hardasan, ömrüm-günüm" şeirlər kitabının Azərbaycan Yazıçılar Birliyində keçirilən təqdimatında onun qələm dostu Musa Ələkbərli söylədi. Z.Qafarlının həyat və yaradıcılıq yoluna qısa ekskurs edən M.Ələkbərli onun kədərli, keşməkeşli, eyni zamanda, mənalı bir ömür yaşadığını, milli ruha bağlı bir şair kimi formalaşdığını vurğuladı.

M.Ələkbərli professor Nizami Cəfərovun Z.Qafarlının kitabına yazdığı ön sözdəki fikirlərə də istinad etdi və bildirdi ki, şairin yaradıcılığını səciyyələndirmək üçün bundan dəqiq ifadə tapmaq çətindir: "O, öz qəlbini, öz içində yaşatdığı ülviyyəti ifadə edir - olduğu kimi, bəzək-düzəksiz".

"Hardasan, ömrüm-günüm" kitabı haqqında fikirlərini bölüşən xalq şairi Sabir Rüstəmxanlı topluda Z.Qafarlının oxucuların qəlbinə asanlıqla yol tapa bilən şeirlərinin toplandığını qeyd etdi. Onun sözlərinə görə, Z.Qafarlının yaradıcılığına xas ən yüksək keyfiyyət səmimilikdir: "Çağdaş şeirimizin tanınan, sevilən nümayəndələrindən biri olan qələm və əqidə dostumun ədəbi taleyinin və yaradıcılığının ən mühüm əlaməti yüksək poetik ovqat və səmimiyyətdir. Məhz bu səmimiyyət onun bütün şeirlərini birləşdirir, sözünün yerini və özəlliyini aydınlaşdırır. Yurd-yuva sevgisi, öz balaca ocağında vətənin, doğma kəndində dünyanın taleyini görmək, fərdi və ictimai xətləri zərif bir şəkildə qovuşdurmaq Zirəddinin şeirlərinə ciddi bir poetik ovqat gətirdiyindən elə ilk addımlarından onu fərqləndirib".

Görüşdə yazıçı-dramaturq Elçin Hüseynbəyli, şair Oqtay Rza və başqaları da çıxış edərək, Z.Qafarlının yaradıcılığı haqqında düşüncələrini dilə gətirdilər.

PAŞA

525-ci qəzet.- 2009.- 18 mart.- 18 mar.- S.7.