Milli təhlükəsizlik orqanlarının 90 illiyi Bakı Dövlət Universitetində qeyd olunub

Dünən Bakı Dövlət Universitetində (BDU) Azərbaycan milli təhlükəsizlik orqanlarının yaranmasının 90 illik yubileyinə həsr olunan tədbir keçirilib. Tədbirdə Milli Təhlükəsizlik Nazirliyi (MTN) əməkdaşları, Milli Məclisin deputatları, alim və tələbələr iştirak ediblər. BDU-nun rektoru Abel Məhərrəmov MTN-in keçdiyi şərəfli inkişaf yolundan, ümummilli lider Heydər Əliyevin bu quruma göstərdiyi diqqət və qayğıdan danışıb. Dövlətçiliyin, milli maraqların etibarlı şəkildə qorunmasında MTN-in mühüm rolunu qeyd edən rektor, əlamətdar gün münasibətilə qurumun rəhbərliyini və əməkdaşlarını təbrik edib.

Milli təhlükəsizlik nazirinin müavini Əli Nağıyev Azərbaycan təhlükəsizlik orqanlarının yaranma tarixi, inkişaf mərhələləri, dövlətçiliyin qorunmasındakı xidmətləri barədə məlumat verib. O bildirib ki, 1919-cu il martında yaradılan Azərbaycan təhlükəsizlik orqanları çətin, amma şərəfli tarixi yol keçib.

Ümummilli lider Heydər Əliyevin 25 ildən artıq Azərbaycan təhlükəsizlik orqanlarında çalışdığını və bu quruma rəhbərlik etdiyini xatırladan nazir müavini, ulu öndərin xüsusi xidmət orqanlarının formalaşmasında və inkişafında böyük rolu olduğunu qeyd edib: "1993-cü ildə xalqın təkidi ilə Heydər Əliyev ikinci dəfə hakimiyyətə qayıdandan sonra onun diqqət və qayğısı sayəsində Milli Təhlükəsizlik Nazirliyinin işi yenidən quruldu. Qurumun fəaliyyəti xeyli təkmilləşdirildi. Ölkənin müstəqilliyi əleyhinə yönələn    qəsdlərin qarşısının alınmasında, milli maraqların qorunmasında təhlükəsizlik orqanları bütün səylərini səfərbər etdi. Xarici xüsusi xidmət orqanlarının kəşfiyyat-pozuculuq və terror-təxribat fəaliyyətinə, beynəlxalq terrorçuluğa, narkotik vasitələrin qanunsuz dövriyyəsinə və transmilli mütəşəkkil cinayətkarlığın digər təzahürlərinə qarşı mübarizə istiqamətində mühüm tədbirlər həyata keçirildi. Bu tədbirlər ölkənin beynəlxalq aləmdə nüfuzunun daha da yüksəlməsinə, digər tərəfdaş dövlətlərin müvafiq strukturlarının bu sahədə MTN-lə əlaqələrinin genişləndirilməsinə zəmin yaratdı".

Milli maraqların və mənafelərin qorunması naminə qazanılan uğurlardan bəhs edən nazir müavini, milli təhlükəsizlik orqanlarının hər bir əməkdaşının bundan sonra da vətənə, dövlətçiliyə ləyaqətlə xidmət edəcəyini vurğulayıb.

Heydər Əliyev adına MTN Akademiyasının rəis müavini Şahin Sultanov ümummilli liderin müvafiq sərəncamı ilə yaradılan akademiyanın fəaliyyəti barədə danışıb. Rəis müavini təhsil müəssisəsində müasir tələblərə cavab verən tədris şəraitinin yaradıldığını və burada yüksək ixtisaslı, bacarıqlı kadrlar hazırlandığını deyib.

Sevinc QARAYEVA

525-ci qəzet.- 2009.- 18 mart.- S.2.