Naxçıvan Dövlət
Universitetinin elazığlılara
Novruz ərməğanı
Əsrlərin o
tayından süzülüb gələn Novruz bayramı milli
varlığımızın təcəssümü, təbiətə
və yaranışa vurğunluq, həyatsevərlik,
oyanış, dirçəliş, birlik və bərabərlik
rəmzidir. Qədimliyi qədər də gözəl olan
Novruz adət-ənənələrini sevə-sevə
yaşadan Naxçıvan Dövlət Universiteti (NDU) bu
bayramda qardaş Türkiyənin Elazığ şəhərindəki
Fırat Universitetinin görüşünə getdi.
Elazığ şəhərindən
keçən Fərat çayının adı ilə
adlandırılan, Türkiyənin 77 universiteti arasında 8-ci
yerdə duran Fırat Universiteti 1975-ci ildən fəaliyyət
göstərir. 11 fakültəsi, 3 elmi tədqiqat institutu,
Bingöl, Tunceli, Keban, Muş və digər yerlərdə 11
Yüksək Məslək Okulu, bir Dövlət
Konservatoriyası, 3 minə yaxın akademik idarə personalı
olan bu universitetdə 18 minə qədər tələbə təhsil
alır.
Naxçıvan
Dövlət Universitetinin rektoru, akademik, millət vəkili
İsa Həbibbəyli ilə Fırat Universitetinin rektoru,
professor-doktor Feyzi Bingölün səkkiz illik dayanıqlı
dostluğu və qardaşlığı sayəsində bu
universitetlər arasında yaranan qırılmaz əlaqələr
ümummilli liderimiz Heydər Əliyevin "bir millət, iki
dövlət" ideyasının ən parlaq təzahürlərindəndir.
Səfər zamanı
universitetlərarası əməkdaşlıq məsələləri
də müzakirə olundu. Naxçıvan Dövlət
Universitetinin Tibb fakültəsinin tələbələrinin
Fırat Universitetinin xəstəxanasında,
"Baytarlıq" ixtisası tələbələrinin
Veteriner fakültəsində, Memarlıq və mühəndislik
fakültəsinin "Energetika sistemləri və şəbəkələri"
ixtisası tələbələrinin isə Keban Baracda - su
elektrik stansiyasında elmi-istehsalat təcrübəsi
keçmələri razılaşdırıldı. Türkiyənin
növbəti Cümhuriyyət bayramında isə
Naxçıvan Dövlət Universitetinin İncəsənət
fakültəsinin elazığlılara sovqatı böyük
Üzeyir bəyin "Arşın mal alan" operettası
olacaq.
Fırat Universitetinin
rektoru professor-doktor Feyzi Bingölün iştirakı ilə
Naxçıvan Dövlət Universitetinin rektoru akademik İsa
Həbibbəyli və Ardahan Universitetinin rektoru professor-doktor
Ramazan Korkmaz arasında müqavilə imzalandı. Müqaviləyə
əsasən, Ardahan Universitetində açılan Azərbaycan
ədəbiyyatı ixtisası tələbələri birinci
ili Naxçıvan Dövlət Universitetində təhsil
alacaq. Tələbələrin sonrakı kurslarda Ardahan
Universitetində təhsillərini mükəmməl şəkildə
davam etdirmələri üçün Naxçıvan
Dövlət Universiteti elmi ədəbiyyatlar, dərslik və
dərs vəsaitləri, audovizual materiallarla köməklik
göstərəcək.
Fırat Universitetinin
rektorluğu tərəfindən düzənlənən
izdihamlı Novruz şənliyi Universitet Evi önündə
Elazığ valisi Muammer Erolun və hər iki rektorun birgə
qaladığı bayram tonqalı ilə başladı. Türk
gənclərinin və NDU-nun "Yallı" qrupu
çiyin-çiyinə halay çəkib yallı getdi, tələbə
Zeynəb Yusifovanın ifa etdiyi saz havası ürəkləri
fəth etdi. Vali və rektorlar Novruz adətlərini yerinə
yetirdilər. Universitetin Atatürk Kültür Mərkəzində
keçirilən möhtəşəm bayram konsertində də
Elazığ valisi Muammer Erol və yerli rəsmilər,
rektorlar, Fırat Universitetinin rektor yardımçıları
professor-doktorlar Orhan Kılıç və Erdal Yılmaz,
NDU-nun tərbiyə işləri üzrə prorektoru, fəlsəfə
elmləri doktoru Məmməd Rzayev və hər iki universitetin
təmsilçiləri, çoxsaylı tələbələr
iştirak etdi.
Fırat Universitetinin
rektoru Feyzi Bingöl türk xalqlarının nicatının
birlikdə olduğunu, bunun üçün ortaq tarixə və
mədəniyyətə sahib çıxaraq ehtiramla
yanaşmağı, türklüyün soy-kökünün gənclər
arasında birgə təbliğini tövsiyə etdi. Rektor
Novruzun 200 milyon türkün birgə qeyd etdiyi çox qiymətli
bayram olduğunu söylədi. Feyzi Bingöl sevgi, birlik və
bərabərlik rəmzi olan türk dünyasının bu
böyük bayramını akademik İsa Həbibbəylinin rəhbərlik
etdiyi qardaş universitetin nümayəndələri ilə
birgə keçirməyin böyük dəyər
daşıdığını vurğuladı.
Naxçıvan Dövlət
Universitetinin rektoru İsa Həbibbəyli
elazığlılara hərarətli bayram təbriklərini
çatdıraraq, iki universitet arasındakı əlaqələrdən
bəhs etdi, bu dostluğa böyük əhəmiyyət
verdiyini söylədi. Rektor Novruz bayramını birgə
keçirmək, eyni zamanda dostu Feyzi Bingölü yenidən
rektor seçilməsi münasibətilə təbrik etmək
üçün gəldiklərini bildirdi. Universitet
rektorları bir-birlərinə hədiyyələr
bağışladılar.
Söz sənətə, musiqiyə verildi. İlk öncə Fırat Universitetinin musiqi kollektivi çıxış etdi, universitet konservatoriyasının müəllimi Mustafa Öztürkün bir-birindən gözəl ifalarından sonra "Azərbaycan diyarından sizə salam gətirmişəm!" deyə səhnəyə çıxan sənətçilərimiz, universitetin Tələbə Teatr Studiyasının rəhbəri, Azərbaycanın əməkdar mədəniyyət işçisi Gülxarə Əhmədovanın başçılıq etdiyi "Yallı" qrupunun ifası alqışlarla qarşılandı. Universitetin müəllimi, respublikanın əməkdar artist Zeynalabdın Babayevin rəhbərlik etdiyi tələbələrdən ibarət instrumental ansamblın müşayiətilə universitetin müəllimləri, Naxçıvan MR əməkdar artistləri Gülyanaq Fərzəliyevanın və Mübariz Əsgərovun ifasında xalq və bəstəkar mahnıları professionallıqla səsləndi. Tələbələrdən Zeynəb Yusifovanın, Əli Bədiyevin, universitetin vokal kvartetinin rəngarəng ifaları əsl bayram ovqatı yaratdı.
Mehriban SULTAN,
Naxçıvan Dövlət Universiteti
mətbuat şöbəsinin müdiri
525-ci qəzet.-
2009.- 30 mart.- S.7.