Gənc diplomatlar Qubadakı soyqırım məzarlığını ziyarət ediblər

Azərbaycan Diplomatik Akademiyasının tələbələri və Xarici İşlər Nazirliyində çalışan gənc diplomatlar erməni vəhşiliyinə dair real faktlarla əyani tanışlıq məqsədilə martın 28-də Qubadakı kütləvi məzarlığı ziyarət ediblər. Akademiyadan verilən məlumata görə, öncə ziyarətçilərə 1918-ci ildə ermənilərin Quba qəzasında törətdikləri vəhşi qırğınlar və soyqırımı faktını sübut edən kütləvi məzarlıqla bağlı ətraflı məlumat verilib. Gənc diplomatlar ermənilərin 1918-ci ildən bəri Azərbaycanda, o cümlədən Qubada törətdiyi soyqırımı aktları barədə bütün dünya ölkələrinə ətraflı məlumat vermək üçün təşəbbüslərini daha da artıracaqlarını bildiriblər. Məlumata görə, ziyarətçilər kütləvi məzarlıqda uyuyan, əksəriyyəti qadın, qoca və uşaq olan insanların sümükləri və bu sümüklər üzərində hələ də aydın seçilən zorakılıq əlamətləri ilə əyani tanış olublar. Gənc diplomatlar ermənilərin 1918-ci ildə Quba qəzasında törətdiyi qırğınların baş verdiyi digər ərazilərə də baxıblar.

S.QARAYEVA

525-ci qəzet.- 2009.- 30 mart.- S.2.