Dünyanın ən yaşlı sakinlərindən biri İsmayıllıda yaşayır

Dünyanın ən uzunömürlü insanlarından biri İsmayıllı rayonunun Kürdmaşı kəndində yaşayır. APA-nın Şirvan bürosunun məlumatına görə, 1890-cı ildə anadan olmuş Nübar Ramazan qızı Həsənovanın hazırda 119 yaşı var. Həyat yoldaşı 1942-ci ildə II Dünya müharibəsində həlak olan Nübar Həsənova övladlarını çox çətinliklə böyüdüb boya-başa çatdırıb. Hazırda Nübar nənənin 2 övladı, 15 nəvəsi, 75 nəticəsi, 28 kötücəsi və 2 yaddıcası var.

Nübar nənənin maraqlı xatirələri var. Ermənilərin 1918-ci ildə azərbaycanlılara tutduğu divanı, həmvətənlərimizə verdikləri işgəncələri gözləri ilə gördüyünü bildirir: "1918-ci ilin mart-aprel ayında erməni daşnakları ilə bolşevik ruslar birləşərək İsmayıllı və Göyçayın bir neçə kəndində qanlı qırğınlar törədib, əliyalın əhaliyə zülm ediblər. Çörəyimizi əlimizdən aldılar, qab-qacağımızı murdarladılar, qadınları, qızları, uşaqları döydülər, təhqir etdilər, kişiləri öldürdülər. Ermənilər kəndləri dağıdaraq xarabazara çevirdilər. Türk-Qafqaz İslam Ordusunun əsgərləri Nuru Paşanın komandanlığı ilə əliyalın, silahsız və günahsız insanlara köməklik göstərmək ğzğn Azərbaycana gəldilər. Onların gəlişini eşidib sevindik. Bizə dedilər ki, hara gedirsiniz, geri qayıdın, türklər gəlib bizi xilas etməyə. Belə də oldu. Türk ordusu Azərbaycan əsgərləri ilə birləşib daşnak erməniləri və bolşevik rusları kəndlərimizdən qovub çıxardılar". Nübar nənə uzunömürlü, sağlam və gümrah olmasının sirlərini də açıqlayıb: "Mən həmişə zəhmətkeş olmuşam, halal pul qazanmışam, süd və tərəvəz məhsulları ilə qidalanmışam və ömrüm boyu namaz qılmışam və indi də Allaha ibadət edirəm". O, yaşının çox olmasına baxmayaraq evdə, həyətdə sərbəst hərəkət edir, toyuq-cücə bəsləyir, özü yemək bişirir, çay dəmləyir. Bu işləri görərkən eynəkdən də istifadə etmir, yaddaşından da şikayəti yoxdur. Nübar Həsənovanın oğlu Şükür Həsənovun 70, qızı Zemfira Cəbiyevanın 80 yaşı var. Uzun ömür sürən Zemfira Cəbiyeva 10 uşaq anası olduğu üçün "Qəhrəman ana" fəxri adına layiq görülüb.

525-ci qəzet.- 2009.- 30 mart.- S.2.