Zərəngiz Dəmirçi “Qayalı”ya imza atıb

Ötən gün Yazıçılar Birliyinin “Bayatı” kitab mağazasında şairə Zərəngiz Dəmirçinin “Qayalı” kitabının təqdimatı keçirilib.

Tədbiri giriş sözü ilə açan “Ulduz” jurnalının baş redaktoru, yazıçı-dramaturq Elçin Hüseynbəyli Z.Dəmirçinin yaradıcılığından danışıb, onun istedadlar yetirən bir yurdun layiqli övladı, dəyərli qələm sahibi olduğunu önə çəkib.

Şairlər Firuzə Məmmədli, Mahirə Abdulla Z.Dəmirçinin fəal vətəndaş mövqeyinə, narahat və duyğulu bir qəlbə, özünəməxsus yaradıcılıq üslubuna malik söz adamı kimi dəyərləndiriblər.

“Zərəngiz Dəmirçi hələ 9 yaşından şeir yazır. Gənc yaşlarından görkəmli ədəbiyyat adamlarının əhatəsindədir. Bütün bunlar onun yaradıcılığına öz müsbət təsirin göstərib, vətənpərvər şairə kimi ədəbiyyat aləminə qədəm qoyub”. Bu fikirləri isə tədbirdə şairə Fəridə Ləman səsləndirib.

Salatın Əhmədli, Fərqanə və başqa həmkarları da Z.Dəmirçi haqqında söz açaraq, yeni kitabı münasibətilə onu təbrik edib, yaradıcılıq uğurları arzulayıblar.

Tədbirdə tələbələrin ifasında Z.Dəmirçinin şeirləri səslənib.

Mərasimin sonunda müəllif çıxış edərək, tədbirin təşkilində zəhməti olanlara və iştirakçılara minnətdarlığını bildirib.

S.MÜRVƏTQIZI

525-ci qəzet.- 2009.- 5 noyabr.- S.7.