“Aydınlığın gül nişanı” təqdim olunub

Rəşid Behbudov adına Mahnı Teatrında şair-publisist Mirkazım Seyidovun “Aydınlığın gül nişanı” adlı kitabının təqdimat mərasimi keçirilib. Kitab görkəmli şərqşünas, Azərbaycanda ərəb filologiyası üzrə ilk qadın elmlər doktoru, professor Aida İmanquliyevanın xatirəsinə həsr olunub. 12 fəsildən ibarət, rus və ingilis dillərində nəşr edilən əsərdə M.Seyidov Aida İmanquliyevanın həyat və fəaliyyət yolu, onun yüksək şəxsi keyfiyyətləri ilə bağlı düşüncələrini əks etdirib. Kitaba xalq şairi Nəriman Həsənzadə ön söz yazaraq, əsərin təqdirəlayiq yaradıcılıq nümunəsi olduğunu qeyd edib.

Tədbirdə çıxış edən müəllif ilk ön cə qonaqlara təşəkkürünü bildirərək, kitaba önsöz yazdığı üçün N.Həsənzadəyə minnətdarlığını bildirib, A.İmanquliyevanın şəxsiyyəti və elmi fəaliyyəti barədə bundan sonra da neçə-neçə dəyərli əsər yazılmasının vacibliyini vurğulayıb.

Tədbir ədəbi-bədii kompozisiya və konsertlə davam etdirilib. Konsertdə tanınmış sənətçilərin ifasında musiqilər səslənib.

Günel MUSAYEVA

525-ci qəzet.- 2009.- 6 noyabr.- S.7.