“Aran” Ədəbi Birliyinin ilk məşğələsi olub

Milli Elmlər Akademiyasının (AMEA) Nizami Gəncəvi adına Milli Ədəbiyyat Müzeyinin Kürdəmir rayonunda fəaliyyət göstərən Aran Regional şöbəsində yeni yaradılmış “Aran” Ədəbi Birliyinin ilk məşğələsi keçirilib. AMEA-nın mətbuat xidmətindən verilən məlumata görə, regional şöbənin müdiri, dərnəyin rəhbəri, filologiya elmləri namizədi Yaqut Bahadurqızı ədəbi birliyin mahiyyətindən danışıb: “Regionda yaşayan ədəbi qüvvələrin bir yerə toplanması, əsərlərinin təqdim edilməsi, müzakirəsi, fikir mübadiləsi, gənc, həvəskar yazarların istiqamətləndirilməsi və ruhlandırılması baxımından ədəbi birliyin təsisi mühüm addımdır”. Dərnəkdə müxtəlif mövzu və üslubda yazan gənclərlə yaşlı nəsil arasında diskussiya olub. İştirakçılar dərnəyə öz bədii yaradıcılıq nümunələrini, regionun toponomiyası, folkloru ilə bağlı araşdırmalarını təqdim ediblər, geniş müzakirələr aparılıb. Dərnək üzvlərindən Nərmin Hüseynzadə, Sahib Mayıloğlu, Könül Şirvanlı, Rəşid Fərəcov, Abduləziz Xanəhmədoğlu, Teyyub Orucov, Tofiq Qasımov, Fikrət Məmmədov və başqalarının şeir, esse və araşdırmaları təqdirəlayiq hesab edilib. İştirakçılar ədəbi birliyin dərnəklərinin vaxtaşırı keçirilməsi və uğurlu ədəbi əsərlərin almanax şəklində dərc olunması təklifini irəli sürüblər.

Sara

525-ci qəzet.- 2009.- 6 noyabr.- S.7.