Yazıçılar Birliyində Oqtay Rzanın 75 yaşı qeyd olunub

Ötən gün Yazıçılar Birliyində (AYB) dəyərli şair Oqtay Rzanın 75 illik yubileyi ilə bağlı mərasim keçirilib. Mərasimi giriş sözü ilə açan AYB-nin katibi Arif Əmrahoğlu O.Rzanın həmişə insanlara müsbət enerji bəxş eləməyindən danışıb: “Oqtay Rzanın gözü kədərli olsa da, üzü həmişə gülüb. O, heç vaxt öz dərdini, ağrı-acısını kiməsə yükləməyə çalışmayıb. Oqtay Rzanın içinin təmizliyi şeirlərinə hopub”.

Tədbirin aparıcısı, “Ulduz” jurnalının baş redaktoru, yazıçı-dramaturq Elçin Hüseynbəyli Oqtay Rzanın yaradıcılığının məziyyətlərindən, onun poeziyasının xəlqiliyindən söz açıb.

AYB-nin mətbuat katibi Ədalət Əsgəroğlu Oqtay Rzanın müsbət auraya malik olmasını çıxışında vurğulayaraq, onu əsl şair ürəkli insan adlandırıb: “Mən Oqtay Rzanı görəndə çox sevinirəm. Çünki o görüşdüyü bütün insanlarla sevincini paylaşan şairdir. Onun yazdığı şeirlər də özü kimi müsbət enerjilidir”. Ə. Əsgəroğlu O.Rzaya həsr elədiyi şeiri tədbir iştirakçıları üçün oxuyub.

Şair İlyas Tapdıq O. Rzanın yaradıcılığında əsas motivin vətənpərvərlik, insanlara sevgi olduğunu çıxışında önə çəkib.

“Oqtay Rza üçün mövzu məhdudluğu yoxdur. O istənilən mövzuda yaxşı şeirlər yaza bilər”. Bu fikirləri isə tədbirdə Yusif Həsənbəy dilə gətirib.

Filologiya elmləri doktoru Buludxan Xəlilov O.Rzanın həm şair, həm də insan kimi yüksək keyfiyyətlərindən bəhs edib: “Onun şeirlərində həyatın ən adi məsələləri çox poetik, obrazlı dillə təsvir olunur. Oqtay Rza bəzən ən adi mövzuya qeyri-adilik verməyi bacarır. Onun həssas şair ürəyi, sevgi ilə dolu qəlbi var”.

Şairlər Ənvər Əhməd, Musa Ələkbərli, Xuraman Vəfa və başqaları yubilyarın yaradıcılığı haqqında danışıblar, müraciət elədiyi mövzuları poetik şəkildə şeirə çevirdiyini bildiriblər.

Sonda çıxış edən O.Rza tədbirin təşkilatçılarına və iştirakçılara minnətdarlığını bildirib, yeni şeirlərini oxuyub.

SARA

525-ci qəzet.- 2009.- 12 noyabr.- S.7.