Bədii qiraət müsabiqəsinin qaliblərinə mükafatlar təqdim edilib

Mədəniyyət və turizm naziri Əbülfəs Qarayev sentyabrda Lənkəran şəhərində keçirilmiş Cəfər Cabbarlının 110 illiyilə bağlı “Deyilən söz yadigardır” IV Respublika bədii qiraət müsabiqəsinin qaliblərinə mükafatlar təqdim edib. Mədəniyyət və Turizm Nazirliyinin mətbuat xidmətindən verilən məlumata görə, mükafatlandırma mərasimində çıxış edən nazir artıq dördüncü dəfə keçirilən müsabiqənin gənclərin Azərbaycan dilinin dərindən yiyələnmələrinə xidmət göstərdiyini vurğulayıb. Daha sonra mədəniyyət və turizm naziri I, II və III yerin qaliblərini, eləcə də həvəsləndirici mükafata layiq görülən gənc qiraətçiləri mükafatlandırıb. 36 şəhər və rayonundan 18-30 yaşlı 86 gənc oğlan və qızın iştirak etdiyi müsabiqədə Lənkəran şəhər sakini Gülər Kərimova birinci, Sumqayıt şəhər sakini Könül Qurbanova ikinci, Ağsu rayon sakini Elnur Mahmudov isə üçüncü yerə layiq görülüb. Əlizamin Həsənli, Xəyalə Meydanova, Arzu Cəlilova isə həvəsləndirici mükafatlarla təltif olunublar. Mədəniyyət və turizm naziri Əbülfəs Qarayevin sərəncamına əsasən, qaliblərə, müvafiq olaraq 500, 300, 250 manat pul mükafatı və diplomlar verilib. Həvəsləndirici mükafat sahiblərinə isə 100 manat məbləğində pul təqdim olunub.

Qeyd edək ki, 2010-cu ilin sentyabr ayında keçirilməsi nəzərdə tutulan növbəti müsabiqə Rəsul Rzaya həsr olunacaq.

SARA

525-ci qəzet.- 2009.- 12 noyabr.- S.7.