“Odlar Yurdu”nda şeir şöləni

Ötən şənbə günü gənclər yenə də sözün işığına toplaşmışdılar. Bu dəfə görüş yeri Odlar Yurdu Universiteti idi. Lazım olan məkana 30 dəqiqə tez çatmışdım. Tədbir bu təhsil ocağının akt zalında baş tutacaqdı. Amma orda başqa bir iclas keçirilirdi. Düşündüm, yəqin ki, bu tədbir də ən azı deyilən vaxtdan yarım saat gec başlayacaq. Lakin sonra əmin oldum ki, gənclər alman dəqiqliyini sevirmişlər. Nə isə...

Tələbələr zala daxil oldu, qapılar arxadan bağlandı. Tədbiri universitetin tələbələri Sitarə və Anar açdı. Onlar qonaqları salamlayıb şeirin-sözün qüdrətindən danışdıqdan sonra poeziya gecəsini aparacaq gənc ədibləri – Odlar Yurdu Universitetinin müəllimi Qismət Rüstəmovu və hər kəlməsindən Azərbaycan ab-havası duyulan, gənclərin daha çox “gənc Zəlimxan Yaqub” adlandırdıqları, sözdən söz çəkən Anar Amini təqdim etdilər. Aparıcılar səhnədə onlar üçün ayrılmış kürsülərdə yer aldıqdan sonra tədbir başladı. Təbii ki, hər bir yığıncaqda ilk sözü ev yiyəsi deyir. Müəllim olması ilə fəxr etdiyini deyən Universitetin rektoru, millət vəkili, professor Əhməd Vəliyev “Təhsili olmayan xalq ölümə məhkumdu,” – fikrini sitat gətirərək, universitetdə tələbələr üçün yaradılmş şəraitdən danışdı. Rektor həmçinin prezident təqaüdü alan gənc ədiblərdən Qismət və Nahidin onun rəhbərlik etdiyi universitetin yetirməsi olduğundan qürur duyduğunu da bildirdi.

İlk söz ”Dünya ədəbiyyatı” dərgisinin baş redaktoru, şair Səlim Babullaoğluna verildi. Səmimi salamdan sonra oxuduğu “Həmidə xanıma” və “Atama” şeirləri gənclər tərəfindən alqışla qarşılandı.

Sonra söz Güney Azərbaycandan gəlmiş şair Ləvaiyə verildi. O da ”Oğluma məktub” və “Sevgilimə məktub” adlı iki şeirini oxudu.

Çıxış edən gənc ədib Qılman İmanlı bu cür tədbirlərin hesabat xarakteri daşıdığını bildirəndən sonra bir neçə şeirini söylədi. Görüşün yeganə xanım iştirakçısı Elnaz Eyvazlıya söz verildi. Özünün “Yaxşı ki yaza bilirəm...” kitabından bir neçə şeir oxuyan gənc şair, bu universitetdə tələbələr üçün yaradılan yüksək şəraitdən də danışdı. “Başqa vaxt əlimə mikrofon keçmir,” – deyərək, bir neçə şeiri, əzbərdən bilmədiyi, eyni zamanda da yanında kağız gəzdirməyi sevmədiyi üçün mobil telefondan oxuyan gənc yazar Əli Əlioğlu sanki texnikanın hər bir zaman insanın köməyinə çatdığını göstərmək istədi. (Amma hərdən texnika insanın illərlə çəkdiyi zəhməti bircə anda məhv edir. Necə? Bax, bunu bir azdan biləcəksiniz.)

Gənc ədib Tapdıq Türksoy avtomobil qəzasında dünyasını dəyişmiş şair Fərhad Metedən danışdı və tədbir iştirakçılarından onun əziz xatirəsini bir dəqiqəlik sükutla anmağı xahiş etdi.

“Əziz gənclər, bu gün çempionlar liqasının seçmə qrup mərhələsində Qismət öz stadionunda bizləri qonaq edir,” – deyib çıxışına başlayan BDU-nun nəzdində fəaliyyət göstərən “Metafora” ədəbi dərnəyinin rəhbəri Kəramət Böyükçöl özünün təzəcə işıq üzü görmüş “Çatlamış fincan” kitabından iki şeir oxudu.

Yadınızdadırsa, bayaq texnikanın insan zəhmətini məhv etməsindən danışdım. Bax, həmin insan məhz gənc şair Kəramət Böyükçöldü. Tədbir başlamamışdan öncə Elnaz Eyvazlıya öz kitabını təqdim edərkən “Sən şeirləri birbaşa kompüterə, yoxsa dəftərə yazırsan? Bilirsən, gələcəkdə şairlər bir-birinə kitab bağışlayanda üstünə mənim sevimli qələm yoldaşım yox, mənim sevimli klaviatura yoldaşım yazacaqlar,” – deyən Kəramətin texnika haqqında olan bu yüksək fikirlərini tədbirin ortasında gələn bir zəng alt-üst etdi. Məlum oldu ki, noutbookunun yanması nəticəsində illər uzunu yazdıqları bircə anda məhv olub. Neynək, ay Kəramət, qələmin sağ olsun. Gördünmü, ay qardaş, kağız-qələm hər şeydən etibarlıdır. Vallah, inan ki, illər keçsə də, kompüter heç vaxt nə kitabın, nə də kağız-qələmin yerini tuta bilməyəcək. Vallah, inan ki, illər keçsə də, kompüter heç vaxt nə kitabın, nə də kağız-qələmin yerini tuta bilməyəcək. Bax haaa, Eldar Ələkbərovun mikrafon əlində gözlərini yumub ürəklə oxuduğu zaman qəfil fanaqramanın kəsilməsini texnikanın qüsuru kimi qiymətləndirmirəm , əziz oxucu!

Tədbirdə Nahid, Elvin Bakiroğlu, Fərid Hüseyn, İlham Çərkəzoğlu və Vüsal Nurunun söylədiyi şeirlər də maraqla qarşılandı.

Tədbir boyu universitetin tələbələri Aysel, Möminə, Vasif və Leylanın, eyni zamanda müğənni Eldar Ələkbərovun ifasında milli və estrada mahnıları da səsləndi. Eyni zamanda, Aysel Yusifovanın ifasında təqdim olunan “Sarı gəlin” rəqsi gecəyə gələnlərə xüsusi zövq verdi.

Hər həftə bir neçə bu kimi tədbirdə iştirak edirəm. Bunların hər birinin özünəməxsus çatışmazlıqları olur, çox təəssüf ki, bu, Azərbaycan reallığıdır. Müasir günümüzdə bu kimi tədbirlərin keçirilməsi çox vacibdi. Ən azından belə görüşlərdə insan mənən dincəlir, ruhən saflaşır. Amma hələ də müasir Azərbaycan gəncliyinin çatışmayan cəhətləri çoxdu. Hələ də bir çox Azərbaycan dinləyicisində dinləmək mədəniyyətinin, tədbirdə sona qədər oturmaq səbrinin olmadığını görürəm. Hələ də Azərbaycan dinləyicisi şeirdən, poeziyadan çox şouya əhəmiyyət verir.Bunu gənclərin tədbir boyu ifa olunan mahnılara reaksiyasından görmək heç də çətin deyildi. Gəncliyimiz sevgi şeirlərinə şeir olduğu üçün deyil, məhz sevgiyə həsr olunduğu üçün önəm verir. Hələ də Azərbaycan gəncliyinin müəyyən hissəsi akt zalı ilə küçədə özünü aparmaq cəhətdən müəyyən fərqlərin olduğunu anlamır. Hələ də Azərbaycan gəncliyi nəyə gülüb, nəyə ağlamaq lazım olduğunu bilmir. Gəlin ümid edək ki, tez-tez keçirilən bu kimi tədbirlər, yazmaq, gündəmdə olmaq xətrinə deyil, məhz cəmiyyətimizi bu kimi xəstəliklərdən xilas etmək üçündür.

Ülkər İLQARQIZI

525-ci qəzet.- 2009.- 17 noyabr.- S.7.