İslami dəyərlərə aid rəsm və tətbiqi sənət nümunələri sərgilənib

Muzey Mərkəzində “Həvəskar rəssam və xalq tətbiqi sənəti ustalarının işlərində İslami dəyərlər” mövzusunda sərgi açılıb. Sərgi Mədəniyyət və Turizm Nazirliyinin nəzdində Mədəniyyətşünaslıq üzrə Elmi-Metodiki Mərkəzin iş planına uyğun olaraq “Bakı-İslam mədəniyyətinin paytaxtı-2009” silsilə tədbirləri çərçivəsində gerçəkləşib. Sərginin əsasnaməsinə uyğun olaraq 2009-cu il oktyabr ayının 12-dən 14-dək Lənkəran, 16-dan 17-dək Şirvan, 20-dən 21-dək Şəki, 24-dən 25-dək Quba, 27-dən 28-dək Gəncə, 30-dan 31-dək Sumqayıt şəhərlərində sərgilər keçirilib. Münsiflər heyəti tərəfindən bölgələr üzrə sərgilərdə nümayiş etdirilmiş müxtəlif janrlarda 450 əsərdən 300-ə yaxını Respublika sərgisinə təqdim olunub. “Bakı-İslam Mədəniyyətinin Paytaxtı–2009” çərçivəsində Muzey Mərkəzində keçirilən növbəti tədbir “Tarix-diyarşünaslıq muzeylərində islami dəyərlərin təbliği” mövzusunda seminar olub. Tədbirdə mövzu ətrafında “Tarix-diyarşünaslıq muzeylərinin ekspozisiyalarının qurulmasında mənəvi dəyərləri əks etdirən materiallar”, “İslamda elm”, “İslamda ailə-məişət”, “Muzeylərdə islami dəyərlərin təbliğinin etik və psixoloji məqamları”, “Qurani-Kərimdəki xalılar”, “Tarix-diyarşünaslıq muzeylərində islami dəyərlərin təbliğinin aktuallığı” mövzusunda məruzələr dinlənilib. Seminarın keçirilməsində əsas məqsəd tarix-diyarşünaslıq muzeylərinin əsas fondlarında mühafizə olunan eksponatların təbliğatı sahəsində biliklərin əldə edilməsidir. Tədbir çərçivəsində Azərbaycan Xalçası və Xalq Tətbiqi Sənəti Dövlət Muzeyinə ekskursiya təşkil olunub.

SARA

525-ci qəzet.- 2009.- 17 noyabr.- S.7.