Afinada Elçin İsgəndərzadənin şeirlər kitabı çıxıb

Yunanıstanın paytaxtı Afinada şair Elçin İsgəndərzadənin “Şairlər qanda ulduz görür” adlı şeirlər kitabı nəşr olunub. Kitab sözügedən ölkənin “Epikinonia AE” Yayın Evi tərəfindən çap edilib. Bugünlərdə şairin iştirakı ilə Afina, Saloniki və Komotini şəhərlərində kitabın təqdimat mərasimi və müəlliflə görüş keçirilib. Şairin qəzetimizə verdiyi məlumata görə, səfər çərçivəsində E.İsgəndərzadə Rodop-Evros vilayətinin qubernatoru, bələdiyyə sədri, Türkiyənin Komotini Baş konsulu, Dimokritus Universitetinin rektoru və digər elmi-mədəni təşkilatların rəhbərləri ilə görüşüb.

Rodop-Evros vilayətinin qubernatoru Georgios Minopoulos tərəfindən professor E.İsgəndərzadəyə vilayətin fəxri vətəndaşı ünvanı və vilayətin rəmzi medalı təqdim edilib.

Şairin şeirlərini yunancaya Ceni Kaçari, Emre Ahmet, Hasan Ahmet, Damon Damianos, Hakan Mümin, Mustafa Çolak ve Şefaat Ahmet çeviriblər.

Kitabın cildində və içərisində tanınmış Yunanıstan rəssamı Füsun Sukanın əsərlərindən istifadə olunub. Kitab və şairin səfəri haqqında Yunanıstanda yayınlanan “Paratiritis”, “Xronos”, “Millet”, “Cumhuriyet”, “Birlik”, “Gündem”, “Trakyanın Sesi” və digər mərkəzi qəzetlərdə ətraflı məlumat verilib, şairlə müsahibələrə və onun yunanca şeirlərinə geniş yer ayrılıb.

Xatırladaq ki, indiyədək Yunanıstanda heç bir azərbaycanlı yazarın kitabı çap olunmayıb, sözügedən nəşr bu sıradan ilk nümunədir.

İndiyədək E.İsgəndərzadənin əsərləri Türkiyə, Rusiya, Bolqarıstan, Rumıniya, Ukrayna, İraq, Makedoniya, İran, Qırğızıstan, Suriya, Şimali Kipr Türk Cümhuriyyəti kimi ölkələrdə çap olunub. “Şairlər qanda ulduz görür” kitabı isə ümumilikdə E.İsgəndərzadənin xaricdə nəşr edilən 23-cü kitabıdır.

S.MÜRVƏTQIZI

525-ci qəzet.- 2009.- 21 noyabr.- S.23.