Milli Kitab Mükafatının Quba səfəri

Milli Kitab Mükafatının bölgələrdə təbliği, şübhəsiz, önəmli məsələdir. Əvvəla, ona görə ki, bu, illərdir bölgədə və paytaxtda yaşayan yazarlarımız arasında sanki qırılmış bağları bərpa etmək yolunda az iş deyil (ilk baxışdan adama elə gələ bilər ki, bunun məsələyə o qədər də aidiyyəti yoxdur, hətta bu, MKM-in məqsədləri sırasında yer almır, amma istənilən müsabiqə həm də fərdi təcrübələri mərkəzləşdirir, onları bir araya gətirir və bu ümumi materiallar arasından seçir, beləliklə, müxtəlif yerlərdən toplanmış materiallar “ələndikdən” sonra ən yaxşıları seçilir və müsabiqənin əhatə etdiyi ərazidə, bütünlüklə təbliğ olunur – deməli, bağlılıq var), yəni hər iki qütbdə ədəbi proses barədə biliklər yenilənir, saf-çürük edilir. İkincisi, konkret hadisənin özü – MKM təşkilatçılarının paytaxtdan bölgələrə getməsi kitaba diqqəti artır, onları küll halında mədəni mərkəzlərə cəm edir – kitabxanalara, mədəniyyət evlərinə gətirir. Üçüncüsü, əyalətdəki yazar bu addımı həm də onun özünə olan diqqətin, önəmin nişanəsi kimi qəbul edirlər – bu onlara müsabiqədə iştirak etməyə – yəni təkcə yazmağa yox, həm də yazdığını utanmadan tirajlamağa, müsabiqədə iştirak edəcək digər müəlliflər və əsərlərlə maraqlanmağa sövq edir. Başqa sözlə, ədəbi mənada fəallığa çağırır – bu təkcə müsabiqə təşkilatçıları üçün deyil, ümumilikdə Azərbaycan ədəbiyyatı üçün vacibdir. Müqəddimə üçün bu qədər yetər, düşünürəm...

Milli Kitab Mükafatı layihəsi çərçivəsində bir qrup jurnalistin də Qubaya səfər edəcəyini eşidəndə sevindim. Çünki ara-sıra əyalətə yolum düşsə də, bu səfərlər bir qayda olaraq şəxsi xarakter daşıyır, iş adamı oldun, belədi də – qohumlarla görüşməyə güclə vaxt tapırıq. Yeni layihə isə rayonlardakı ədəbi proses barədə məlumat almağa, “kim kimi oxuyur” sualına aydınlıq gətirmək üçün ən yaxşı vasitədir. Sonuncu sualla bağlı onu da deyim ki, gənc yazarlar arasında belə bir fikir hakimdir – bizdə ancaq yazarlar kitab oxuyur, o da həmişə yox...

50 ÜSTƏGƏL...

Amma Qubaya səfər əsnasında – elə Nəqliyyat Nazirliyinin qarşısında bizi gözləyən mikroavtobusa toplanan zaman maraqlı bir detal ortaya çıxdı. Səfərdə təşkilatçı Nigar Köçərlidən, Münsiflər Heyətinin üzvü Rəşad Məciddən və jurnalistlərdən başqa, aramızda layihə barədə Facebookdan xəbər tutan bir xanım da vardı və bu xanım MKM-in bölgələrdə necə qarşılandığı ilə ciddidən-ciddiyə maraqlanırdı. Bunu eşidəndə sevincimi ilk növbədə arxa oturacaqlarda möhkəmlənmiş həmkarlarım Ülviyyə Heydərova və Fərid Hüseynlə bölüşdüm...

Avtobus yola düşən kimi yadırğaya bilmədiyim peşə xəstəliyi özünü göstərir, Nigar xanımdan müsabiqəyə neçə müəllifin qoşulduğunu soruşuram və cavab (təxminən 50-dən çox) məni qane edir. Sonra təşkilatçı ilə Münsiflər Heyətinin üzvü arasında işgüzar söhbətlərə qulaq asıram. Nigar MKM-lə bağlı yayılmaqda olan şayiələrdən, müxtəlif qəzetlərdə çıxan məqalələrdən danışır. Qulaq verirəm, arada qeydlər götürürəm, hərçənd, bilirəm ki, bu qeydlərin sonrakı prosesdə mənə heç bir dəxli olmayacaq. Bu da peşə vərdişidir – qeyd aparmaq, sadəcə, özünü daha əmin hiss etməyə yarayır, vəssəlam.

Yol uzunu müsabiqənin şərtlərini bir daha dəqiqləşdiririk, Aynur və Əhmədlə jurnalistikadan, Ülviyyə və Fəridlə ədəbiyyatdan danışırıq, arada qeybət elementləri də olur, təbii – yol uzundu, neyləyəsən...

Qubanın mərkəzi kitabxanasının həyətində bizi Yazıçılar Birliyinin bölgə üzrə rəhbəri şair Ramiz Qusarçaylı qarşılayır. Hava sinoptiklərin vəd etdikləri qədər soyuq olmasa da, dəhlizdəcə üşüyürük. Amma tədbirin keçiriləcəyi otaq, doğrudan da, istidir. R.Qusarçaylı qubalılara MKM barədə məlumat verir, Bakıdan gələnlərə Qubada 12 ildir fəaliyyət göstərən və özünün rəhbəri olduğu “Ay işığı” ədəbi məclisindən danışır. Fürsət tapıb zaldakı kontingentə nəzər salıram: burada ən müxtəlif nəsillərin nümayəndələrinə rast gəlmək olar – məktəblilərdən tutmuş ağsaqqallaradək...

BƏLKƏ BUNDAN SONRA NASİRLƏR ARTA...

Bizim gözləmədiymiz halda, Rəşad Məcid çıxışına şeirlə başlayır və sonra addımını izah edir. Sən demə, MKM yalnız nəsr əsərləri üçün nəzərdə tutulduğundan natiq şairlərin könlünü almaq istəyirmiş. Nigar xanım müsabiqənin məqsədlərinə aydınlıq gətirir. Elə zaldaca məlum olur ki, müsabiqəyə qatılmaq istəyənlər var. Xaçmazda fəaliyyət göstərən “Ulduzlar” ədəbi məclisinin fəallarından olan Mehralı Quliyev kitabını Nigar xanıma təqdim edir. Təşkilatçı onu da qeyd edir ki, əyalətdəki yazarlar kompüter və internet problemi olduğundan, onlar mətnlərini kağız və ya kitab halında da poçtla Təşkilat Komitəsinə göndərə bilərlər.

Sonra Quba və Xaçmazdan olan şairlər vətənpərvərlik və məhəbbət mövzusunda şeir oxuyurlar. Tədbirsonrası söhbət zamanı R.Qusarçaylı ilə həmin şeirləri müzakirə edirik. YB-nin bölgə rəhbəri MKM-in Quba səfərindən sonra bölgədə nasirlərin sayının artacağına ümid etdiyini söyləyir.

“ƏMMA”SIZ ƏMMA...

Qubadan çıxıb, Xaçmaza RTV televiziyasının binasına yollanırıq – regional televiziya ilə yayımlanan “Əmma” adlanan tok-şounun qonağı oluruq. İntəhası, aparıcı Teymur Əliyevin etiraf elədiyi kimi, hərçənd, “Əmma” problemləri qabartmağa, onlara diqqət çəkməyə hesablanıb və hətta məmurlara qarşı belə çox zaman sərt mövqe sərgiləyir, bu dəfə mövzuya “əmma” qoymaq çətin olacaq. Çünki müzakirə predmeti – kitaba veriləcək mükafatla bağlıdır. Yeri gəlmişkən, “Əmma”da Quba və Xaçmazdan olan yazarlar da iştirak edirdilər və verilişin gedişində onların xüsusi fəallıq göstərmələri artıq MKM-in Quba səfərinin uğurlu keçdiyindən xəbər verir.

RƏBİQƏ

525-ci qəzet.- 2009.- 24 noyabr.- S.7.