Yazıçılar Birliyində İlyas Tapdıqın 75 yaşı qeyd olunub

Tanınmış şair İlyas Tapdıqın 75 illik yubileyi keçirilib. Azərbaycan Yazıçılar Birliyinin (AYB) mətbuat katibi Ədalət Əsgəroğlunun verdiyi məlumata görə, tədbirdə o və qurumun şeir şöbəsinin sədri Çingiz Əlioğlu İlyas Tapdıqı birliyin rəhbərliyi və üzvləri adından təbrik ediblər. Yazıçı-dramaturq Elçin Hüseynbəyli, şairlər Ramiz Heydər, Fikrət Sadıq, Abbas Abdulla, Ənvər Əhməd, Ramiq Muxtar, Musa Ələkbərli və başqaları İlyas Tapdığın yaradıcılığından, insani keyfiyyətlərindən söz açıblar. Bildirilib ki, İlyas Tapdıq doğulduğu Gədəbəy rayonunun Əliismayıllı kəndinin təbiətini, insanların bənzərsizliyini ədəbiyyata gətirən şairdir. Öz yaradıcılığında bu gözəlliyi məharətlə əks etdirib. İlyas Tapdıqın şeirlərində Azərbaycanın gözəl təbiəti, qədirbilən insanları vəsf edilib, onu təbiət şairi kimi tanıdıb.

Çıxış edənlər yubilyarın poeziyaya 1953-cü ildə “Azərbaycan” jurnalında dərc olunmuş “Bakının gecəsi” şeiri ilə gəldiyini və bu günədək 40-dan çox şeir və poema kitabının nəşr edildiyini bildiriblər. İ.Tapdıqın indiyədək müasir şairlərin 700-dən çox kitabının redaktoru olması, gənc şairlərin yaradıcılığına qayğı ilə yanaşması da tədbirdə dilə gətirilib. Vurğulanıb ki, yubilyar rus, bolqar, polyak, türkmən və digər 20-dək ölkənin şairlərinin əsərlərini dilimizə tərcümə edib, özünün bədii irsi də ölkəmizdən kənarda nəşr olunub. Çıxışlarda İ.Tapdıqın uşaqlar üçün də gözəl şeirlər, poemalar yazdığı xüsusi vurğulanıb.

Sonda İ.Tapdıq tədbirin təşkilatçılarına və mərasimə qatılanlara minnətdarlığını bildirib, yeni şeirlərini oxuyub.

SARA

525-ci qəzet.- 2009.- 20 noyabr.- S.7.