“Azərbaycan”ın yeni sayları

Ədəbi prosesə güzgü tutan sanballı dövri nəşrlərdən olan “Azərbaycan” jurnalının 9-cu və 10-cu sayları işıq üzü görüb. Hər iki sayın “Poeziya” bölməsində Musa Yaqub, Oqtay Rza, Firuzə Məmmədli, Nisə Bəyim, Yafəs Türksəs, Fəxrəddin Əsəd, Əlizadə Nuri, Ələsgər Həsənli, İsa Sevər, Mirsəyyaf Zamanlı, Zaur Quliyev, Əlisəmid Kür, Çingiz Bahaduroğlu, Məlahət Ağacanqızı, İltifat Saleh, Səyyarə Məmmədli, Qəşəm Nəcəfzadə, Firudin Şahbuzlu, Vəliş Qaragöl və Bahadur Fərmanın şeirləri təqdim olunub.

Hüseynbala Mirələmov, Gülşən Lətifxan, Kamran Nəzirli, Lətif Əlizadə, Vəli Məmmədov, Əlövsət Bəşirli, Bayram İsgəndərli, Dəhnəli Məmməd Hacızadənin əsərləri nəsrsevərlərin ixtiyarına verilib.

Dramaturgiya bölməsində Elçin Hüseynbəylinin “Qaçaq qocalar” ikihissəli pyesi dərc olunub.

Ədəbi gənclik bölümündə Gənc Ədiblər Məktəbinin üzvləri Feyziyyə, Vüsal Nuru və Xəyalə Sevilin şeirləri çap edilib.

Cəfər Xəndanın 100 illik yubileyi münasibətilə Tərlan Novruzovun qələmə aldığı “Görkəmli sabirşünas” məqaləsi jurnalın 9-cu sayında çap olunub.

Səkinə Maqsudun “İsa Muğanna: bədii sözün böyük yaradıcısı”, Zaman Əsgərlinin “Könüllərin fatehi – Əhməd Yəsəvi”, Dilarə Məmmədovanın “Nəcəf bəy Vəzirovun “Palıd” əsəri”, Eşqanə Babayevanın “Nəcib Fazil Qısakürək: ayağa qalx, Sakarya” yazıları jurnalın 9-cu sayında verilib. Atababa İsmayıloğlunun yazıçı Aqşin Babayevlə “Həyat həqiqəti, yazıçı təxəyyülü və bədii əsər” adlı müsahibəsi, “Teatral freskalar” rubrikasında isə Aydın Talıbzadənin “Xəfif təbəssümlü maska” yazısı jurnalda yer alıb. Vaqif Yusiflinin “Ömrün altmışıncı payızı, yaxud fəhləlikdən akademikliyə” yazısı İsa Həbibbəylinin 60 illik yubileyi münasibətilə qələmə alınıb.

Tənqid və ədəbiyyatşünaslıq bölümündə xalq yazıçısı Elçinin “Azərbaycan ədəbi prosesində nə baş verir” adlı yazısı dərc olunub.

Qəzənfər Paşayevin “Gərgin əməyi bəhrəsi” məqaləsində isə müəllif akademik Bəkir Nəbiyevin “Seçilmiş əsərləri” haqqında fikirlərini yazıya alıb.

S.MÜRVƏTQIZI

525-ci qəzet.- 2009.- 27 noyabr.- S.23.