“Ataların bir yadigar sözü var”

KİTABI İCTİMAİYYƏTƏ TƏQDİM OLUNDU

Oktyabrın 4-də Muğam Teatrında görkəmli el şairi Fətəli Alıoğlunun “Ataların bir yadigar sözü var” kitabının təqdimatı keçirilib. Tədbirin aparıcısı, kitabın tərtibçisi, şair Bağman Baba F.Alıoğlunun yaradıcılığından söz açaraq el sənətkarının ruhən azad, əqidəsinə, məsləkinə həmişə sadiq olmasından söz açıb. B.Baba F.Alıoğlunun həyat və yaradıcılıq yoluna nəzər salıb: “Fətəli Hüseynov 1921-ci ildə Azərbaycanın dilbər güşələrindən olan Tovuz rayonunda dünyaya gəlib. İkinci dünya müharibəsinin iştirakçısı olub.1943-cü ildə ağır yaralanıb və ikinci qrup əlil kimi vətənə qayıdıb”. B.Baba F.Alıoğlunun “Səni düşünürəm” adlı ilk kitabının 1998-ci ildə işıq üzü gördüyünü bildirib.

Filologiya elmləri doktoru, professor Nəsir Əhmədli şair F.Alıoğlunun həmişə saf duyğulu, təmiz, mərd və əqidəsinə sadiq, dostluqda etibarlı olduğunu bildirərək onun əsl şair ömrü yaşadığını qeyd edib.Sözügedən kitabın nəşrinə maddi dəstək verən, ön sözün müəllifi Namazalı Məmmədov şairin atalar sözləri və el məsəllərindən yerində istifadə etməklə duyğulu, düşüncəli, bir-birindən istər mənaca, istərsə də qafiyə baxımından fərqli şeir nümunələri yaratdığını söyləyib: “Onun yazdığı şeirlərin hər birində hikmət dolu yeni-yeni fikirlər ifadə olunur. N.Məmmədovun yazdığı ön sözdə F.Alıoğlunun Səməd Vurğun, Aşıq Nəcəf və başqa görkəmli şəxsiyyətlərlə bağlı xatirələrindən bəhs olunub:

“O, Hüseyn Bozalqanlı ilə görüşüb ünsiyyətdə olub. Qaraxanlı aşıq Vəli ilə dostluq münasibətləri qurub. Ön sözün müəllifi sözügedən kitabı nəşr etdirməkdə əsas məqsədin yenidən Fətəli yaradıcılığına üz tutmaq, Fətəlisevərlərin ruhunu oxşamaq olduğunu önə çəkib.

Şair Elxan Zal Qaraxanlı çıxışında şeirləri dildə-ağızda dolaşan, lakin kitabları çap olunmamış el sənətkarlarının hələ sağ ikən dəyərləndirilməsinin, əsərlərinin nəşrinin vacibliyindən danışıb. Elxan Məmmədli kitabın işıq üzü görməsində əməyi olan hər kəsin, həm maddi dəstək verən N.Məmmədovun, həm də tərtibçi B.Babanın zəhmətini yüksək dəyərləndirib: “ El sənətkarlarının yaradıcılığına belə həssaslıqla , qayğıyla yanaşmaq mədəniyyətimizə, ədəbiyyatımıza verilən töhfədir”. Tədbirin təşkil olunmasında böyük əməyi olan, millət vəkili Qənirə Paşayeva Tovuz elinin yetirməsi olan F.Alıoğlunun şeirlərinin kitab halında işıq üzü görməsindən məmnun olduğunu dilə gətirib: “Tədbirin gedişatında haqlı olaraq qeyd etdilər ki, nəinki dünyasını dəyişən, həm də hələ həyatda olan el sənətkarlarının kitablarını nəşr etdirmək lazımdır. Onlar sadəcə yazıb-yaradan, gözü zirvələrdə olmayan, iddiasız el şairləridir. Onların kitablarını xalqa çatdırmaq millətə edilən böyük xidmətdir”. Millət vəkili çıxışında N.Məmmədov kimi xeyriyyəçilərin sayının çox olmasını arzulayıb: “Belə nəcib iş üçün vəsait sərf edənlərə təşəkkür edirəm, çünki onların belə alicənab addımları, gördükləri xeyirxah işlər millətimizin, gələcəyimizin xeyrinədir”. Q.Paşayeva gələcəkdə də bu nəşrlərin və təqdimatların ardıcıl olacağına əminliyini ifadə edib.Mərasimin sonunda Alı Fətəlioğlu çıxış edərək atasının xatirəsini əziz tutanlara, təqdimat mərasimini təşkil edənlərə minnətdarlığını bildirib.

Təqdimat mərasimi Nəzakət Teymurova, Gülyaz Məmmədova, Könül Xasıyeva, aşıqlar Azər Xanlaroğlu, Dəmir Gədəbəyli, gənc xanəndə Bəyimxanım və başqalarının ifası ilə başa çatıb. Qeyd edək ki, “Ataların bir yadigar sözü var” kitabında el şairinin gəraylı, qoşma, ustadnamə və təcnisləri toplanıb.

Sevinc MÜRVƏTQIZI

525-ci qəzet.- 2009.- 6 oktyabr.- S.7.