Sergey Yesenin Mərdəkanda anıldı

Rusiyanın Azərbaycandakı səfirliyi və Rusiya İnformasiya-Mədəniyyət Mərkəzinin (RİMM) təşkilatçılığı ilə Mərdəkan qəsəbəsində görkəmli rus şairi Sergey Yeseninin anadan olmasının 114 illiyi münasibətilə tədbir keçirilib. RİMM-dən verilən məlumata görə, tədbirdə Rusiya, Özbəkistan və Moldovanın ölkəmizdəki səfirləri, ölkənin bəzi nazirlikləri, Əzizbəyov Rayon İcra Hakimiyyətinin və ictimai təşkilatların nümayəndələri iştirak ediblər.

Rusiyanın ölkəmizdəki səfiri Vladimir Doroxin çıxışında tədbirə görə, dərin minnətdarlığını ifadə edib: “Görkəmli şair Sergey Yesenin Bakının Mərdəkan qəsəbəsində cəmi 70 gün qalıb. Bu qısa müddətə baxmayaraq, Azərbaycan xalqı ona daim hörmətlə yanaşıb və onun yaşadığı evi muzey edib”. Səfir Yeseninin ev-muzeyinə onun iki şeirinin surətini bağışlayıb. Qeyd edək ki, bağışlanan şeirlərin surəti Rusiyanın Azərbaycandakı səfirliyinin xahişi ilə Yesenin adına Moskva Dövlət Muzeyində hazırlanıb.

Çıxış edənlər dahi rus şairinin həyat və yaradıcılığından söz açıblar və Yeseninin Mərdəkanda ev-muzeyinin açılmasında ümummilli lider Heydər Əliyevin xidmətlərini xüsusilə vurğulayıblar.

Mərasimdə “Günay” uşaq teatrının, 2 nömrəli internat məktəbinin nəfəs alətləri orkestrinin və 145 nömrəli məktəbin şagirdlərinin ifası nümayiş etdirilib.

Tədbirin sonunda Vladimir Doroxin şagirdlər arasında rus dili və ədəbiyyatı üzrə keçirilmiş olimpiadanın qaliblərinə diplom və hədiyyələr təqdim edib.

SARA

525-ci qəzet.- 2009.- 7 oktyabr.- S.7.