Azərbaycan folkloru “Ulduz salxımı”nda

Rusiyada MDB klassik ədəbiyyatı silsiləsi çərçivəsində Azərbaycan folkloru və ədəbiyyat nümunələri haqqında yeni kitab nəşr olunub. Dünya Azərbaycanlıları Konqresinin (DAK) mətbuat xidmətindən verilən xəbərə görə, “Ulduz salxımı” adlanan kitab MBD ölkələrinin Dövlətlərarası Humanitar Əməkdaşlıq Fondunun dəstəyi ilə işıq üzü görüb. Rus dilində 3000 tirajla çap olunan kitabın müəllifi Moskvada yaşayan soydaşımız, filologiya elmləri doktoru, DAK həmsədrlərinin MDB üzrə müavini Abuzər Bağırovdur. Kitabda Azərbaycan şifahi və yazılı xalq ədəbiyyatından seçmələr verilib. Miflər və əfsanələr, bayatılar, laylalar, atalar sözləri, nağıllar kimi folklor nümunələri ilə açılan kitabın növbəti bölməsində “Kitabi Dədə Qorqud” dastanı bütövlükdə təqdim olunub. “Aşıq poeziyası” başlığı altında Aşıq Qurbaninin, Aşıq Alının və Aşıq Ələsgərin şeirləri verilib. N.Gəncəvi, M. Füzuli, M. Ş Vazeh, H. Cavid kimi, Azərbaycan yazılı ədəbiyyatının 19 görkəmli ədibinin əsərləri və onların hər birinin həyat və yaradıcılığı haqqında qısa məlumat “Poeziya” bölməsində yer alıb.

SARA

525-ci qəzet.- 2009.- 15 oktyabr.- S.7.