Şair Kəmaləddin Qədimin yeni kitabı nəşr olunub

Bu yaxınlarda “Vektor” Beynəlxalq Elm Mərkəzində şair Kəmaləddin Qədimin “Allahdı, şeytandı, mənəm” adlı kitabı işıq üzü görüb. Kitab şair haqqında yazılmış məqalələrdən fraqmentlərlə açılır. Onların sırasında xalq şairi Bəxtiyar Vahabzadə, tənqidçi Vaqif Yusifli, şairlər Akif Səməd, Elçin İsgəndərzadə, Adil Mirseyid, Məmməd İlqarın yazılarından hissələr yer alıb. Xalq şairi B.Vahabzadə K.Qədimin şeirlərində “yamsılamanın olmadığını”, “onun yaşayıb yazdığını” qeyd edib. Mərhum şair Akif Səməd K.Qədimi “Halal sözün öz adamı, düz adamı” adlandırıb.

Kitabın redaktoru Adil Mirseyid “Şeirinə bənzəyən şair” adlı önsöz yazıb. A.Mirseyid “ədəbiyyatda antiklassisizmin meydan sulamağa cəhd elədiyi bir dövrdə K.Qədimin klassisizm ənənələrinə sadiq qaldığını” vurğulayıb. O, K.Qədimin lirikasını “gerçəklik çərçivəsi içində yazdığı şeirlərə oxşayan bir şairin poetik avtoportreti” adlandırıb.

Qeyd edək ki, K.Qədimin poeziyasında xəlqilik, məhəbbət və vətənpərvərlik hissləri dolğun şəkildə, eyni zamanda vəhdət halında əks olunub:

İllər keçib, Xan Çobanın

Meyli hələ o qızdadı.

Gözü hələ yollardadı,

Qəlbi hələ murazdadı.

Biri Arpaçayda batıb,

Gör neçəsi Arazdadı...

Apardı sellər Saranı...

Onun şeirlərində xalqın canlı danışıq dili, bu dilin metaforik qatları, el ifadələri yerli-yerində işlənir:

Beləmi olmusan ömrün uzunu,

Çörəyin dizinin üstündə olub.

Əllərin əlimin, gözün gözümün,

Canın da canımın qəsdində olub.

Uzağı, bir damla yaşam gözündə,

Bir kərə sıxarsan, gözündən düşər.

Sevgin də dizinin üstündə imiş,

Durarsan, sürüşüb dizindən düşər.

Kitabda şairin yeni əsərlərilə yanaşı, 80-ci illərdə qələmə aldığı, çap olunmamış şeirləri və “Yeddi yamaq vuran xatun”, “Danışır qoca” poemaları da oxuculara təqdim olunub.

S.MÜRVƏTQIZI

525-ci qəzet.- 2009.- 17 oktyabr.- S.24.