Azərbaycanlı rəqqasə Rusiyada hind rəqsləri müsabiqəsində birincilik qazanıb

Rusiyanın paytaxtı Moskvada keçirilən iki beynəlxalq hind rəqsləri festival-müsabiqəsində azərbaycanlı rəqqasə Oksana Rəsulova da iştirak edib. O.Rəsulovanın APA-ya verdiyi məlumata görə, həmin festival-müsabiqələrdən biri Hindistanın Mədəniyyət Festivalı “Divaly –2009” olub. Həmin festivalda Azərbaycanı təmsil edən həmyerlimiz birinci yerə layiq görülüb: “Bu müsabiqədə 10-a yaxın ölkə iştirak edirdi. Festivalda solo hind rəqsləri müsabiqəsi keçirildi. Həmin müsabiqədə Azərbaycan birinci yeri qazandı. Müsabiqədə müxtəlif ölkələri təmsil edən münsiflərin hamısı mənə ən yüksək 10 xalı verdilər”. Həmyerlimizin qatıldığı ikinci müsabiqə isə oktyabrın 15-18-də keçirilib: “Bu müsabiqə də Rusiyada keçirildi. Ötən illərdə bu müsabiqədə mən birinciliyi qazanmışdım. Bu dəfə isə müsabiqədə birinci və ikinci yer Rusiya rəqqaslarına, üçüncü yer isə Azərbaycana verildi. Azərbaycanın adını üçüncü çəkəndə bütün zaldakı tamaşaçılar gülüşürdülər, çünki nəticə onları qane etməmişdi. Festivaldan sonra münsiflər heyətində təmsil olunan müasir və klassik hind rəqslərini tədris edən müəllim Aşvanini Neqam mənə yaxınlaşdı və mənim rəqsimə heyran olduğunu bildirdi. Bildirdi ki, həm artistlik, həm rəqs, həm də hind elementlərinə görə mənə ən yüksək xalı verib. Orada olanda “İndia TV” kanalından təkliflər aldım. Həmin kanalın proqramlarına, konsertlərə dəvət olundum. Eləcə də Hindistanda keçiriləcək müsabiqələrdə də iştirak etməyə dəvət almışam”.

525-ci qəzet.- 2009.- 22 oktyabr.- S.7.