“Azərbaycanca danışaq. Dil və mədəniyyət” kitabı təqdim olunub

PROFESSOR KAMAL ABDULLA VƏ MİŞEL MALERBİN HAZIRLADIQLARI BU KİTAB AZƏRBAYCAN-FRANSA ƏLAQƏLƏRİNDƏ ÖNƏMLİ HADİSƏ KİMİ DƏYƏRLƏNDİRİLİB

Oktyabrın 21-də Bakı Slavyan Universitetinin konfrans zalında Fransanın “Harmattan” nəşriyyatında işıq üzü görən “Azərbaycanca danışaq. Dil və mədəniyyət” kitabının təqdimat mərasimi keçirilib. BSU-nun rektoru, AMEA-nın müxbir üzvü, professor Kamal Abdullanın və “Harmattan” nəşriyyatının “Danışaq” seriyasının direktoru Mişel Malerbin müəllifləri olduqları bu kitab Azərbaycan dilini öyrənmək istəyən fransızlar üçün əsl hədiyyəyə çevrilib. Tədbiri açıq elan edən BSU-nun prorektoru, professor Məmməd Əliyev kitabın önəmini vurğulayaraq, onun Azərbaycan və Fransa arasındakı mədəni əlaqələrin inkişafında böyük rol oynayacağına əmin olduğunu bildirib: “Fransada, Parisdə Azərbaycanla bağlı çap olunan digər kitablar da var. Amma məhz bu kitabın sayəsində Fransada Azərbaycan dilini öyrənmək istəyənlərin sayı artıb”.

Sonra söz alan kitabın müəlliflərindən biri Mişel Malerb bu kitabın Azərbaycan dilini öyrənmək istəyənlər üçün fransız dilində ilk kitab olduğunu bildirib. Kitabın böyük bir layihənin tərkib hissəsi olduğunu qeyd edən M.Malerb artıq bu seriyadan 150-yə yaxın kitabın işıq üzü gördüyünü söyləyib: “Bu layihə 20 ilə yaxındır ki, həyata keçirilir. Layihə çərçivəsində çap olunan kitabların hamısının forması eynidir – əvvəlcə kitab hansı xalqın dilinə həsr olunubsa o xalq haqqında ümumi məlumat verilir. Sonra gündəlik danışıqda istifadə olunan sözlərin və cümlələrin fransız dilində qarşılığı qeyd edilir. Bunun ardınca həmin xalqın mədəniyyəti, tarixi ilə bağlı məlumat yer alır”.

Qeyd etmək lazımdır ki, “Azərbaycanca danışaq. Dil və mədəniyyət” kitabının “Dağlıq Qarabağ münaqişəsi aktual problemdir” adlı bölməsində müəlliflər oxucunun diqqətini məsələnin əsl mahiyyətinə yönəldir, bu konfliktin tarixinin ən azı XVII əsrdən başladığını, ermənilərin əsas məqsədlərinin öz ərazilərini genişləndirmək olduğunu və bu məkrli siyasətlərini həyata keçirmək üçün Qafqazda təxribatçılıqla məşğul olduqlarını, Azərbaycana qarşı hər zaman millətçilik və terrorçuluq siyasəti apardıqlarını tarixi faktlarla əsaslandırırlar.

Tədbirdə çıxış edən BSU-nun Diplomatiya kafedrasının müəllimi Fuad Həsənov Fransadan gəlmiş qonaqları fransız dilində salamlayandan sonra belə bir dəyərli kitabı araya-ərsəyə gətirdiklərinə görə hər iki müəllifə minnətdarlığını bildirib.

Sonra çıxış edən BSU-nun prorektoru, professor Asif Hacıyev belə bir kitabın Azərbaycanda fransız dilini öyrənənlər üçün də hazırlanmasının vacib olduğunu söyləyib. O, bu işi də Mişel Malerb və Kamal Abdulla kimi mütəxəssislərin öz üzərlərinə götürmələrinin vacibliyini bildirib. Tədbirdə çıxış edən digər alim və müəllimlər də bu istəyə şərik olduqlarını dilə gətiriblər.

S.QARAYEVA

525-ci qəzet.- 2009.- 23 oktyabr.- S.7.