“Xəzər” jurnalının yeni sayı çapdan çıxıb

Bugünlərdə “Xəzər” dünya ədəbiyyatı jurnalının növbəti sayı işıq üzü görüb. Dərgi baş redaktor Afaq Məsudun “İlahi keçid” bölümündə təqdim olunan önsözü ilə açılır. Önsözdən sonra həmin başlıq altında X əsrin nəhəng sufi mütəfəkkiri Şeyxi Əziz Nəsəfi haqqında Lloyd Raycenin eyniadlı elmi-tədqiqat əsərindən bir parça təqdim olunub.

Selma Lagerlöfün jurnalda çıxan Nobel nitqi və nağıllarını dilimizə Ülkər Nəsibbəyli çevirib.

“Ədəbi fenomen” rubrikasında Ramiz Rövşənin tərcüməsində Qriqore Viyerunun şeirlər silsiləsi öz əksini tapıb.

Jurnalın bu sayında çap olunan Somerset Moemin “Ledi Frederik” üçpərdəli komediyası yazıçı Yaşarın tərcüməsində oxucuların ixtiyarına verilib. Yaşarın təqdimatında S.Moemin “Teatr” romanının davamı da dərginin bu sayındadır.

Ülkər Nəsibbəylinin tərcümə elədiyi növbəti yazılar Milorad Paviçə aiddir. Dərginin bu sayında yazıçının avtobioqrafiyası, “Dövlətə bənzər roman” essesi, “Məbəd şəkilli ağ Tunis qəfəsi” hekayəsi, “Yazıçı kimi mən iki yüz il əvvəl doğulmuşam” başlıqlı müsahibəsi oxuculara təqdim edilib.

Aleksandr Blokun yazıçı Firuz Mustafanın tərcüməsində şeirləri jurnalın “Bəşəri poeziya” bölməsindədir.

Jurnalda işıq üzü görən maraqlı tərcümələrdən biri də Jorj Amadunun “Qumsallıq kapitanları” əsəridir. Romanı dilimizə İ.Əlfioğlu çevirib.

Ü.Nəsibbəyli tərəfindən təqdim olunan ənənəvi “Ədəbi mozaika” rubrikasında oxucular dünya ədəbiyyat aləmində baş verən ən son yeniliklərlə tanış olmaq imkanı əldə edəcəklər. Bölümdə təqdim olunmuş xəbərlər bu il üçün “Buker” mükafatının kanadalı yazıçı, 77 yaşlı Elis Münroya verilməsi, görkəmli Kolumbiya yazıçısı Qabriel Qarsia Markesin yazmağa davam etməsi, XX əsrin ikinci yarısının ən görkəmli Latın Amerikası yazıçılarından Mario Benedettinin vəfatının səbəbləri, 1996-cı ilin bukerçisi Qrem Sviftin şəxsi arxivini Britaniya kitabxanasına satması və başqa məlumatlar əks etdirilib.

S.MÜRVƏTQIZI

525-ci qəzet.- 2009.- 31 oktyabr.- S.23.