Azərbaycan folkloru və Abdulla Şaiqin əsərləri alman dilində

Ötən gün Abdulla Şaiqin mənzil-muzeyində avstriyalı müəllif Liliane Qrimmin alman dilinə tərcümə etdiyi "Azərbaycan folkloru" kitabının təqdimat mərasimi keçirilib. Tədbiri giriş sözü ilə açan muzeyin baş mühafizi, ədibin nəvəsi Ülkər Talıbzadə təqdimatı əlamətdar hadisə kimi dəyərləndirərək, Azərbaycan folklorunu, eləcə də A.Şaiqin əsərlərini alman oxucusuna çatdıran L.Qrimmə minnətdarlığını bildirib. Ü.Talıbzadə tədbirin keçirilməsində əsas məqsədin Azərbaycan folklorunun, eləcə də A.Şaiqin yaradıcılığının xarici ölkələrdə nəşri və təbliğinə diqqət yönəltmək olduğunu vurğulayıb.

Xarici İşlər Nazirliyinin təmsilçisi Nəsimi Ağayev Azərbaycan ədəbiyyatının başqa ölkələrin vətəndaşları tərəfindən maraqla qarşılanmasından və həmin əsərlərin xarici dillərə tərcümə olunmasından məmnunluğunu dilə gətirib.

Tədbirdə çıxış edən L.Qrimm son illər Azərbaycan ədəbiyyatı ilə ciddi maraqlandığını önə çəkib: "Mən 2002-ci ildə ilk dəfə həyat yoldaşımla Azərbaycana gəlmişəm. Həmin vaxt aldığım ilk təssürat çox güclü oldu. Mən bu səfər müddətində Azərbaycanın mədəniyyəti, ədəbiyyatı, incəsənəti ilə yaxından tanış olmaq imkanı əldə etdim. Elə həmin il Abdulla Şaiqin yaradıcılığı ilə tanış oldum və onun "Tülkü həccə gedir" əsəri çox xoşuma gəldi. Bu əsər uşaqlar üçün yazılsa da, orada böyüklərin də həyat dərsi alacağı çox mətləblər var". Alman dilinə tərcümə elədiyi kitabda Azərbaycanın xalq nağılları ilə yanaşı, A.Şaiqin əsərlərinin də yer aldığını deyən L.Qrimm bu yaxınlarda xalq yazıçısı Anarın "Mən, sən, o və telefon", "Dantenin yubileyi" əsərlərini almancaya çevirdiyini açıqlayıb. O, gələcəkdə daha bir sıra Azərbaycan ədiblərinin əsərlərini alman dilinə tərcümə etmək arzusunda olduğunu dilə gətirib.

Muzeyin böyük elmi işçisi Minaxanım Əsədli A.Şaiqin yaradıcılığının Şərqdə olduğu kimi, Qərbdə də sevildiyini bildirib: "Şaiqin nağılları Qərbdə, Avropada da rəğbətlə qarşılanır. Ədibin əsərləri indiyədək rus, ingilis, alman, fransız, rus dillərinə tərcümə edilib".

Alman-Azərbayan İqtisadi Birliyinin icraçı direktoru Florian Şröder, Almaniya Texniki Əməkdaşlıq Cəmiyyətinin Bakı ofisinin icraçı direktoru Franz Heinzmann, Kitab Klubunun, C.Məmmədquluzadə, C.Cabbarlı, S.Vurğun, N.Nərimanov və digər ədiblərin ev-muzeylərinin əməkdaşlarının iştirak etdiyi tədbirdə qonaqlar fikir mübadiləsi aparıblar, muzeyin ekspozisiyası ilə tanış olublar.

S.MÜRVƏTQIZI

525-ci qəzet.- 2009.- 30 sentyabr.- S.7.