"Heydər Əliyev. Şəxsiyyət və Zaman" kitabı ictimaiyyətə təqdim olunub

Ötən gün Atatürk Mərkəzində "Gənc Liderlər" Uşaq Təşkilatının təşəbbüsü ilə yazıçı-publisist, millət vəkili Elmira Axundovanın "Heydər Əliyev. Şəxsiyyət və Zaman" dördcildilk kitabının təqdimat mərasimi keçirilib. Tədbiri giriş sözü ilə "Gənc Liderlər"in sədri Fərid Şahbazlı açaraq, kitabın əhəmiyyətindən danışıb: "Millət vəkili Elmira Axundovanın bu kitabı ulu öndərimiz Heydər Əliyevin mənəvi irsini öyrənmək baxımından gənclərin bəhrələnəcəyi önəmli nəşrdir".

Millət vəkli Nizami Cəfərov kitabın ümummilli liderin şəxsiyyətinə və fəaliyyətinə səmimi münasibətin ifadəsi olduğunu önə çəkib. N.Cəfərov təqdim olunan nəşri H.Əliyevin 86 illiyinə layiqli töhfə, mərhum prezidentin xatirəsinə dərin ehtiramın təzahürü kimi dəyərləndirib.

Milli Məclisin üzvlərindən Lalə Abbasova, Zahid Oruc da kitabla, müəllifin ümummilli lider irsinə yanaşması ilə bağlı fikirlərini bölüşüblər. Onlar kitabın Azərbaycanda gələcək nəslin dövlətçilik hissilə tərbiyəsində özünəməxsus rol oynayacağına, böyük siyasi xadimin mənəvi irsinə yaxından bələd olmaq istəyənlərin stolüstü kitabına çevriləcəyinə inam ifadə ediblər.

İndiyədək E.Axundovanın müxtəlif vaxtlarda işıq üzü görmüş "Naşirin qətli", "Həqiqət anları", "Şüşə saray" kitablarının böyük maraqla qarşılandığını vurğulayan çıxışçılar növbəti nəşrin də oxucularda rəğbət doğuracağına əmin olduqlarını bildiriblər.

Kitabın müəllifi təqdimatı keçirilən çoxcildlik roman-tədqiqatı ömrünün ən mühüm layihəsi hesab etdiyini deyib. E.Axundova kitab hazırlanarkən Heydər Əliyevin şəxsi arxivində işləmək üçün ona ölkə prezidenti İlham Əliyev tərəfindən müvafiq şərait yaradıldığını minnətdarlıq hissilə açıqlayıb.

Heydər Əliyevin ilk bioqraflarından sayılan E.Axundovanın təqdim edilən kitabının önsöz müəllifi tanınmış qazax ədibi Oljas Süleymenovdur. O.Süleymenov yazısında kitabın böyük məhəbbətdən qaynaqlandığını bildirərək, E.Axundovanın faktlara münasibətdə prinsipiallıq göstərdiyini, həqiqətləri qələmə aldığını qeyd edib.

Müəllifin beş ilə yaxın davam edən gərgin zəhmət bahasına ərsəyə gətirdiyi tədqiqatın əsasında kitabın qəhrəmanının uşaqlıq və gənclik dostları, qohumları və yaxınları ilə lentə alınmış çox sayda söhbət, tanınmış siyasi xadimlər və dövlət adamları ilə müsahibələr, DTK arxivlərində, prezidentin şəxsi arxivində iş nəticəsində əldə olunan faktlar dayanır. E.Axundovanın Heydər Əliyevlə şəxsi tanışlığı və görüşlərilə bağlı məqamlar da kitabda geniş yer alıb.

Sevinc MÜRVƏTQIZI

525-ci qəzet.- 2009.- 2 may.- S.25.