Abdulla Şaiqin tərcüməsində Ruminin "Məsnəvi"si yenidən nəşr edilib

Görkəmli ədib, şair və pedaqoq Abdulla Şaiqin ev-muzeyində ədibin "İbrət və müqabilə, yaxud ümmətlər ixtilafı" kitabının təqdimatı keçirilib. Yenidən çap olunmuş kitab dahi mütəfəkkir Mövlanə Cəlaləddin Ruminin "Məsnəvi"sinin tərcüməsidir. Kitab AMEA-nın Füzuli adına Əlyazmalar İnstitutunun böyük elmi işçisi Arif Ramazanov tərəfindən ərəb əlifbasından müasir əlifbaya transliterasiya edilib.

Təqdimat mərasimində Abdulla Şaiqin araşdırmaları, Nizami, Füzuli, Nəsimi, Vaqif, M.F.Axundov, C.Məmmədquluzadə, M.Hadi, H.Cavid və digər görkəmli söz adamları haqqında məqalələri və tərcümələrinin bu gün də böyük dəyər kəsb etdiyi vurğulanıb. Tədbirdə məktəblilərin ifasında şairin uşaqlar üçün yazdığı şeirlərdən ibarət kompozisiya təqdim olunub.

Sonda ədibin nəvəsi Ülkər Talıbzadə babası ilə bağlı xatirələrini bölüşüb, tədbir iştirakçılarına A.Şaiqin yaradıcılığına göstərdikləri diqqətə görə minnətdarlığını bildirib.

SARA

525-ci qəzet.- 2009.- 2 may.- S.25.