Şəkidə xalq artisti Canəli Əkbərovun yubileyi qeyd olunub
Sabit Rəhman adına
Şəki Dövlət Dram Teatrında xalq artisti, görkəmli
muğam ustası, professor Canəli Əkbərovun anadan
olmasının 70 illiyilə bağlı yubiley tədbiri təşkil
edilib. Teatrın mətbuat xidmətindən verilən məlumata
görə, tədbiri giriş sözüylə açan
Şəki Şəhər İcra Hakimiyyəti
başçısının müavini Zərinə Cavadova
görkəmli muğam ustasının həyat və
yaradıcılığından danışıb:
"Muğam sənətinin inkişafında Canəli Əkbərovun
xidmətləri əvəzsizdir. O, öz dəsti-xətti ilə
seçilən, yüksək xanəndəlik məharəti və
səhnə mədəniyyəti ilə dinləyicilərin
hörmətini qazanan xanəndələrimizdəndir".
Görkəmli sənətkarın
ömür və fəaliyyət yolundan söz açan
çıxışçılar C.Əkbərovun uzun illər
Azərbaycan Dövlət Filarmoniyasının solisti
olduğunu, Dövlət Akademik Opera və Balet
Teatrının səhnəsində İbn Səlam, Məcnun,
Şah İsmayıl, Aşıq Qərib kimi məşhur
obrazları məharətlə yaratdığını önə
çəkiblər.
Mərasimdə Dövlət
Akademik Milli Dram Teatrının aktyoru, xalq artisti İlham Əsgərov,
şəhər mədəniyyət və turizm şöbəsinin
müdiri Aydın İbrahimxəlilov, Yazıçılar
Birliyinin nümayəndəsi Vaqif Aslan və başqaları
yubilyarı təbrik edərək ona xoş arzularını
çatdırıblar. Yubiley tədbirində sənətkarın
yetirmələri maraqlı konsert proqramı ilə
çıxış ediblər. Həmçinin tədbirdə
yubilyarın ömür yolundan bəhs edən sənədli
film də göstərilib.
Mərasimin sonunda Şəki
Şəhər İcra Hakimiyyətinin
başçısı Nazim İbrahimov Azərbaycan muğam sənətinin
inkişafına böyük töhfələr vermiş
görkəmli sənətkarı 70 illik yubileyi münasibətilə
təbrik edib və ona xatirə hədiyyəsi
bağışlayıb. Yubilyar tədbirin təşkilatçılarına
və iştirakçılarına minnətdarlıq hisslərini
ifadə edib.
Xatırladaq ki,
hazırda Dövlət Mədəniyyət və İncəsənət
Universitetinin kafedra müdiri və professoru olan Canəli Əkbərov
milli muğam sənətimizin inkişafındakı xidmətlərinə
görə 1992-ci ildə xalq artisti fəxri adı alıb. Xanəndə
2000-ci ildə "Şöhrət" ordeninə, 2002-ci ildə
Prezident təqaüdünə, 2005-ci ildə isə Heydər
Əliyev Fondunun təqaüdünə layiq
görülüb.
Sevinc MÜRVƏTQIZI