Bakı Dövlət Universitetində Rus Mərkəzi yaradılır

Tezliklə Bakı Dövlət Universitetində (BDU) "Rusiya dünyası" Fondunun Rus Mərkəzi açılacaq. Qeyd edək ki, hazırda Fondun Azərbaycanla yanaşı, Belçika, Yaponiya, ABŞ, Tacikistan, Qırğızıstan, Qazaxıstan və digər ölkələrində də bu cür mərkəzləri fəaliyyət göstərir. Bu mərkəzlərin işi rus dilinin və rus mədəniyyətinin qorunmasına, yayılmasına yönəlib.

BDU-dan verilən məlumata görə, mərkəzin açılmasında əsas məqsəd rus dili və ədəbiyyatının, ümumilikdə Rusiya mədəniyyətinin geniş təbliğinə şərait yaratmaqdır. Eyni zamanda ali təhsil müəssisəsində təhsil alan tələbələrə Mərkəz vasitəsilə Rusiya mədəniyyəti və incəsənətilə daha yaxından tanışlıq imkanı vermək də önəmli məqsədlərdəndir.

2007-ci ildən etibarən Rusiya prezidentinin müvafiq fərmanı ilə yaradılan "Rusiya dünyası" Fondu rus dili və ədəbiyyatının təbliğinə yönələn rus mərkəzlərinin yaradılması işini həyata keçirir. Bu mərkəzlər açıldığı zaman 1000-dən artıq adda kitabla təmin olunur, sonradan isə fəaliyyəti daha da genişləndirilir. Mərkəzlərə gələnlər Rusiya media orqanlarının elektron versiyası ilə pulsuz tanışlıq imkanı əldə edirlər. Fond rəhbərliyi gələcəkdə Mərkəzdə metodiki iş prosesində ensiklopediyaların, məlumat kitabçalarının, rus dili lüğətlərinin, Rusiyanın bədii, maarif, uşaq ədəbiyyatının, eyni zamanda multimedia buraxılışları kolleksiyasının - Rusiya kinemotoqrafiyasının, rus dili proqramını öyrədən audiokitabların, tədris-metodika vəsaitlərinin yer alacağı kitabxananı daha da zənginləşdirəcək. BDU-dakı Mərkəzə müraciət edən tələbə və müəllimlərin Rusiya media orqanlarının elektron versiyası ilə pulsuz tanış olması üçün lazımi şərait yaradılacaq.

S.QARAYEVA

525-ci qəzet.- 2009.- 2 may.- S.22.