Süleyman Yağız: "Bir millət-iki dövlət" duyğusuna zərər verilməməlidir"

DSP-dən olan millət vəkili Süleyman Yağız Türkiyə-Azərbaycan əlaqələrilə bağlı verdiyi açıqlamasında hazırda yaşanan bu sıxıntılı dövrdə iki ölkənin və xalqların qardaşlıq münasibətlərinə ziyan dəyəməməsi üçün diqqətli davranmağın vacibliyini vurğulayıb: "Bu baxımdan, "Bir millət-iki dövlət" duyğusuna zərər verə biləcək hər hansı addım atılmamalıdır. Bu duyğulara heç cür zərər verilə bilməz. Son günlər Türkiyə ilə Azərbaycan arasında bir gərginlik hökm sürür. Təəssüf ki, bu gərginliyin səbəbkarları Ermənistan mövzusunda Azərbaycanın mövqeyini arxa plana keçirən hazırkı Türkiyə hökumət dairələridir. Təbii ki, bu səbəbdən azərbaycanlı qardaşlarımız dərin üzüntü içərisindədirlər".

Millət vəkilinin fikrincə, azərbaycanlılar Türkiyə-Azərbaycan münasibətlərinə illər öncə mərhum prezident Heydər Əliyevin dilə gətirdiyi "Bir millət-iki dövlət" duyğusuyla yanaşırlar: "Türk milləti tərəfdən də bu duyğu qarşılıqlıdır. Dolayısıyla bu, hər iki ölkə xalqının ortaq duyğusuna çevrilib. Ona görə də yaşanan bu sıxıntılı zamanın azəri-türk qardaşlığına zərər verməməsi üçün hər iki tərəfin diqqətli olması vacibdir. Biz qardaşlığımızı yoldan tapmamışıq. Qardaşlar bir-birilərinin maraqlarını qulaqardına vura bilməzlər. Heç bir qardaşın buna haqqı yoxdur. Unutmayaq ki, qardaşlarının maraqlarına əhəmiyyət verməyənlər başqalarıyla da sağlam münasibət yarada bilməzlər. Hörmətli prezident Gül və hörmətli baş nazir Ərdoğan bunu dərindən dərk etməlidirlər. Ermənistan məsələsi, əlbəttə ki, çözülməlidir. Amma bu yöndə iş görülərkən bəzi kənar çevrələrin marağına uyğun hərəkət edilməməli, qardaş dövlətin və millətin haqqı tapdanmamalıdır". Süleyman Yağız hesab edir ki, ABŞ prezidenti Barak Obamanın qondarma soyqırım məsələsini "böyük fəlakət" anlamı verən ermənicə kəlməylə dilə gətirməsi kənar qüvvələrin bu mövzuda səmimilikdən uzaq olduğunu, keçmişdəki kimi, bu gün də aldatma və bəhrələnmə siyasətini davam etdirdiyini bir daha ortaya qoyub: "Türkiyəni idarə edənlər artıq bu cür tələlərə düşməməlidirlər. Əlbəttə ki, kənar münasibətlərə də önəm verməlidir, amma bu zaman kimsəyə təslim olmamalı, öz ölkəmizin, millətimizin və soykökümüzün gücünə inanaraq hərəkət etməliyik".

Millət vəkili Azərbaycana sevgisini, qardaş millətə bağlılıq duyğularını şeirlə ifadə etdiyini də bildirib: "10 il əvvəl ortaq bir dillə yazmağa çalışdığım "Ay can Azərbaycan" şeirimin azəri-türk qardaşlığının ifadəsi kimi qarşılanmasını istərdim:

   Men sana kardaş diyerem,

   men sana yoldaş.

Men sana can diyerem,

sen mene can,

ay can, Azerbaycan!

İktifa eyleyemem ne desem,

kucahlamak istiyerem.

   Men sana men diyerem

sen mene men,

özlerem, özlerem, can,

ay can, Azerbaycan!

Menim gönlüm sende,

seninki mendedir.

Gözlerim yolda,

üreyim sendedir,

indi sene gelirem, can,

ay can, Azerbaycan!

kağızlar yetmez kaleme,

yazsam neçe kelime,

dün de, bugün de

sevirem seni,

men de sana "gel" diyerem,

gel mene can,

ay can, Azerbaycan!

S. Yağız

525-ci qəzet.- 2009.- 2 may.- S.24.