Xalq yazıçısı İsmayıl Şıxlı Pedaqoji Universitetdə yad edilib

Azərbaycan Dövlət Pedaqoji Universitetində (ADPU) xalq yazıçısı, görkəmli pedaqoq, ictimai xadim İsmayıl Şıxlının anadan olmasının 90 illik yubileyinə həsr olunmuş elmi-praktik konfrans keçirilib. ADPU-dan verilən məlumata görə, tədbiri giriş sözü ilə açan ADPU-nun rektoru, AMEA-nın müxbir üzvü Yusif Məmmədov çıxışında yazıçının şəxsiyyətinə xas əsas cizgiləri dilə gətirib: "İsmayıl Şıxlı şəxsiyyətinin əsas atributları millilik və bəşərilik, azərbaycançılıq, ziyalılıq və kübarlıq, əqidə və xarakter bütövlüyü, sadəlikdə müdriklik idi. Sovet ideologiyasının tüğyan etdiyi bir zamanda Cahandar ağa simasında mərd, cəsur bəy obrazı yaradan İsmayıl Şıxlı öz xarakterinin bir çox ən parlaq cizgilərini bu surətdə əks etdirməyi bacarıb. Azərbaycan xalqının XX əsrdə yetişdirdiyi ən böyük simalardan biri olan İsmayıl Şıxlının gənc nəslin təlim-tərbiyəsindəki rolu və əvəzsiz xidmətləri də unudulmazdır".

Tədbirdə "İsmayıl Şıxlının həyat və yaradıcılıq yolu" mövzusunda məruzə ilə çıxış edən professor Buludxan Xəlilov ədibi böyük vətənpərvər, əsl müəllim, görkəmli alim, istedadlı yazıçı kimi xarakterizə edib.

Digər məruzəçilər İ. Şıxlının uzun illər hazırkı ADPU-nun filologiya fakültəsində baş müəllim, xarici ölkələr ədəbiyyatı kafedrasının müdiri kimi fəaliyyət göstərdiyini qeyd ediblər. Yazıçının ədəbi fəaliyyətini də önə çəkən çıxışçılar onun müxtəlif illərdə "Azərbaycan" jurnalında baş redaktor, Azərbaycan Yazıçılar İttifaqının birinci katibi və digər vəzifələrdə çalışdığını bildirərək yaradıcılıq yolundan danışıblar: "Yazıçının ilk mətbu əsəri sayılan "Quşlar" şeiri 1938-ci ildə "Ədəbiyyat" qəzetində işıq üzü görüb. Nəsr yaradıcılığına 1947-ci ildə "İnqilab və mədəniyyət" jurnalında çap etdirdiyi "Həkimin nağılı" hekayəsi ilə başlayan yazıçı bundan sonra "Konserv qutuları", "Səhəri gözləyirdik", "Həkimin nağılı", "Kerç sularında", "Haralısan, ay oğlan?" oçerklərini, "Ayrılan yollar", "Dəli Kür", "Ölən dünyam" romanlarını qələmə alıb".

Çıxış edənlər əsərləri keçmiş SSRİ və xarici ölkə xalqlarının dillərinə tərcümə olunan İsmayıl Şıxlının sağlığında bir çox fəxri adlarla, orden və medallarla təltif edildiyini də diqqətə çatdırıblar. Sonda tələbələrin ifasında yazıçının roman və hekayələri əsasında hazırlanmış ədəbi-bədii kompozisiya təqdim olunub.

Yazıçının oğlu, tanınmış jurnalist Elçin Şıxlı çıxış edərək, atasının xatirəsinə göstərilən ehtirama görə minnətdarlığını bildirib.

Sevinc MÜRVƏTQIZI

525-ci qəzet.- 2009.- 2 may.- S.20.