"A-dan Z-yə telexəbər" kitabının təqdimatı keçirildi

Dünən Azərbaycan Media Mərkəzində Bakı Dövlət Universitetinin radio və televiziya kafedrasını müəllimi Zeynal Məmmədlinin müəllifi olduğu "A-dan Z-yə telexəbər" kitabının təqdimat mərasimi keçirilib.

"Yeni Nəsil" Jurnalistlər Birliyinin sədri Arif Əliyev bildirib ki, bu kitab müəllifin ağır zəhməti nəticəsində ərsəyə gəlib. Onun sözlərinə görə, kitab indiki jurnalistika fakültələrində oxuyan tələbələr və televiziyalarda çalışan jurnalistlər üçün praktik vəsaitdir.

Kitabın elmi redaktoru, professor Qulu Məhərrəmli bildirib ki, tələbələr imtahan vaxtı hər hansı ədəbiyyat əldə edəndə onlar üçün bayram olur. Onun dediyinə görə, bu, tələbələrin axtardığını verə biləcək bir kitabdır: "Bugünkü telejurnalistlər üçün hazır reseptlərin verilməsi çox çətindir. Eyni zamanda onların konkret bir şəraitdə necə hərəkət etmələri diqqət çəkən məsələlərdən biridir. Bu kitabda müəllif konkret məsələni göstərib və onunla bağlı bir neçə resept göstərib. Kitabda TV xəbərləri və ümumən xəbər jurnalistikası ilə bağlı gərəkli bilgilər əksini tapıb. Burada televiziya xəbərlərinin planlaşdırılması, çəkilişi, montaj və bununla bağlı digər məqamlara diqqət yetirilib və bütövlükdə telexəbərlərin menecmetindən söz açılıb".

Bakı Dövlət Universitetinin jurnalistika fakültəsinin müəllimi Akif Rüstəmovun sözlərinə görə, telexəbərin balanslı şəkildə verilməsi kitabda əksini tapıb. Onun fikrincə, kitab jurnalistlərin və tələbələrin peşəkarlıq səviyyələrinin artırılması istiqamətində əhəmiyyətli rol oynacaq.

Zeynal Məmmədli özü isə deyib ki, kitabın oxunaqlı olması üçün sadə yazılması vacibdir. O, vəziyyətin dəyişməsindən asılı olaraq, hər zaman kitabın aktuallığının saxlanmasının vacibliyini qeyd edib: "Bu-günkü telexəbərlərə diqqət saldıqda və eyni zamanda telejurnalistlərin peşəkarlıq səviyyəsini nəzərə aldıqda bir sıra suallar ortaya çıxır. Fikrimcə, əxlaqlı jurnalistlər doğru xəbəri yazmaq üçün bu kitabdan öyrənə bilərlər".

BƏXTİYAR

525-ci qəzet.- 2009.- 5 may.- S.3.