Heydər Əliyevə həsr olunan interaktiv mühazirə keçirilib

Dünən Bakı Slavyan Universitetində (BSU) "İrəli" İctimai Birliyinin təşəbbüsü ilə "Öndərimizin yolundayıq" devizi altında keçirilən Heydər Əliyev həftəsi çərçivəsində interaktiv mühazirə təşkil olunub. Tədbirdə çıxış edən BSU-nun rektoru, professor Kamal Abdulla deyib ki, ümummilli lider Heydər Əliyev unikal bir siyasi məktəbin, mükəmməl dövlətçilik və idarəçilik sisteminin banisidir: "Heydər Əliyev ideoloji-siyasi irsin müəllifi kimi əbədiyaşarlıq qazanıb. O, həyatını Azərbaycana, xalqın firavan gələcəyinə həsr edib. Onun böyüklüyünü bu gün hər kəs etiraf edir və illər keçdikdə daha dərindən anlayır".

"İrəli" İctimai Birliyinin sədri Ceyhun Osmanlı tədbirin keçirilməsinə şərait yaratdığına görə BSU-nun rəhbərliyinə təşəkkürünü bildirib. O deyib ki, ölkənin aparıcı ali təhsil müəssisələrindən biri olan BSU-da H.Əliyevin xatirəsi hər zaman uca tutulur.

Nəsimi Rayon İcra Hakimiyyətinin başçısı Nəsib Məhəməliyev qeyd edib ki, H.Əliyevin apardığı məqsədyönlü siyasət nəticəsində Azərbaycanda siyasi sabitlik bərqərar olub, ölkə inkişaf yoluna qədəm qoyub.

Tədbirdə Milli Məclisin İqtisadi siyasət daimi komitəsinin sədri Ziyad Səmədzadə "Heydər Əliyev - liderlikdən ümummilli liderliyə gedən yol", millət vəkili Məlahət Həsənova "Heydər Əliyev haqqında bilmədiklərimiz", Yeni Azərbaycan Partiyası Gənclər Birliyinin sədri Ramil Həsənov "Heydər Əliyev- gəncliyin xatirələri" adlı məruzələrlə çıxış ediblər.

S.QARAYEVA

525-ci qəzet.- 2009.- 5 may.- S.2.