İsmayıl Şıxlının 90 illiyi qeyd olunub

Ötən gün M.F.Axundov adına Milli Kitabxanada Mədəniyyət və Turizm Nazirliyinin birgə təşkilatçılığı ilə xalq yazıçısı İsmayıl Şıxlının 90 illiyinə həsr olunmuş kitab sərgisi və oxucu konfransı keçirilib. Milli Kitabxananın direktoru Kərim Tahirov İ.Şıxlının Azərbaycan ədəbiyyatındakı özünəməxsus mövqeyindən, illər keçsə də əhəmiyyətini itirməyən əsərlərindən söz açıb.

Professor Nizami Cəfərov Azərbaycan ədəbiyyatını İ.Şıxlının yaradıcılığı olmadan təsəvvür etməyin qeyri-mümkünlüyünü vurğulayaraq, onun ustalıqla yazıb-yaratdığı, ali insani duyğuları əks etdirən əsərlərindən danışıb.

Yazıçı Vidadi Babanlı İ.Şıxlı haqqında xatirələrini tədbir iştirakçıları ilə bölüşərək, onu həm yazıçı, həm də şəxsiyyət kimi yüksək dəyərləndirib.

Yazıçının oğlu, Jurnalistlər Birliyinin sədri Elçin Şıxlı atasının xatirəsinə ehtiram göstərdiklərinə görə tədbirin təşkilatçılarına və qonaqlara minnətdarlığını bildirib.

Tədbirdə İ.Şıxlının müxtəlif illərdə işıq üzü görmüş "Dəli Kür", "Namərd gülləsi", "Məni itirməyin", "Ölüləri qəbiristanlıqda basdırın", "Xatirəyə dönmüş illər", "Mənim rəqibim", "Dağlar səslənir", "Ayrılan yollar", "Dostum Hüseyn Arifin lətifələri", "Daşkəsən", "Cəbhə yolları", "Daim axtarışda", "Ölən dünyam" kitabları və "Azərbaycan", "Ulduz" jurnallarında yazıçı ilə aparılmış müsahibələr sərgilənib.

Dövlət Musiqili Komediya Teatrında da İ.Şıxlının yubileyilə bağlı xüsusi gecə keçirilib. Gecədə Yazıçılar Birliyinin sədri Anar, millət vəkili Nizami Cəfərov yubilyar haqqında geniş və əhatəli çıxış ediblər. Onlar millilik və bəşəriliyin, ziyalılıq və kübarlığın, əqidə və xarakter bütövlüyünün, sadəlik və müdrikliyin İsmayıl Şıxlı şəxsiyyətinin əsas xüsusiyyətləri olduğunu bildiriblər. Sonra Akademik Milli Dram Teatrı aktyorlarının ifasında İsmayıl Şıxlının "Ölüləri qəbiristanlıqda basdırın" əsəri əsasında hazırlanmış eyniadlı tamaşa göstərilib.

Sevinc MÜRVƏTQIZI

525-ci qəzet.- 2009.- 6 may.- S.7.