"Təbii sərvətlərimizə sahib çıxaq, ətraf mühitimizi qoruyaq"

Dünən Bakı Dövlət Universitetində "Təbii sərvətlərimizə sahib çıxaq, ətraf mühitimizi qoruyaq" adlı elmi konfrans keçirilib. Mərasimdə Yeni Azərbaycan Partiyası Gənclər Birliyinin sədri Ramal Həsənov çıxış edərək ekologiyaya həsr olunmuş elmi konfransın əhəmiyyətindən danışıb. O qeyd edib ki, Yeni Azərbaycan Partiyasının Gənclər Birliyi ümumilli lider Heydər Əliyevin anadan olmasının 86-cı ildönümü ilə əlaqədar olaraq Ekologiya və Təbii Sərvətlər Nazirliyi ilə birlikdə "Təbii sərvətlərimizə sahib çıxaq, ətraf mühitimizi qoruyaq" adlı lahiyəni reallaşdırıb: "Aprelin ayının 15-dən bu layihəyə start verilib və layihənin birinci mərhələsində Bakı və Sumqayıt şəhərlərini əhatə etməklə tələbə-gənclər arasında "Təbii sərvətlərin rasional istifadəsi" və "Təbii sərvətlərimizə sahib çıxaq" adlı məqalə müsabiqəsi keçirilib. Həmçinin aprelin 21-dən 25-dək Gəncə, Şəki, Yevlax, Quba və Lənkəran şəhərlərində bu mövzuda Ekologiya və Təbii Sərvətlər Nazirliyinin mütəxəssisləri tərəfindən həmin bölgələrdəki gənclərimizə treninq kurslar keçirilib. Həmin tədbirlərin yekunu olaraq isə may ayının 5-də Bakı Dövlət Universitetində adıçəkilən mövzu ilə əlaqədar elmi konfransın keçirilməsini planlaşdırmışdıq və bu konfrans bu gün baş tutdu. Elmi konfransın keçirilməsində əsas məqsəd hazırda respublikamız üçün aktual olan ekoloji problemlərin həllinə yardımçı olmaqdan ibarətdir. Biz istəyirik ki, ətraf mühitin qorunması və ekoloji tarazlığın bərpası istiqamətində həyata keçirilən tədbirlərdə gənclərimizin də əməyi yüksək olsun".

Bakı Dövlət Universitetinin prorektoru, professor İsmayıl Əliyev çıxışı zamanı diqqəti qlobal ekoloji problemlərə yönəldib. O, son illər dövlət başçısının bilavasitə sədrliyi ilə ekoloji problemlərin müzakirəsinə həsr olunmuş müşavirələrin keçirilməsini xatırladaraq bildirib ki, yerləşdiyi coğrafi məkana görə mühüm əhəmiyyət kəsb edən Azərbaycanda, ətraf mühitlə bağlı qəbul olunmuş dövlət proqramlarının icrasına diqqətin artırılması, dövlət başçısı tərəfindən mövcud ekoloji problemlərin daha səmərəli həll edilməsi məqsədilə müvafıq sərəncamların imzalanması, bu sahənin ölkəmizdə prioritet məsələlər sırasında olduğunu sübut edir.

Ekologiya və Təbii Sərvətlər Nazirliyinin departament rəhbəri Mirsalam Qəmbərov hazırda respublikamız üçün aktual olan ekoloji problemlərin davamlı inkişaf prinsipləri əsasında müvafiq dövlət proqramları çərçivəsində həll edilməsi istiqamətində görülən işlər barədə konfrans iştirakçılarına geniş məlumat verib.

Millət vəkilləri Fəttah Heydərov və Aydın Mirzəzadə isə ümummilli lider Heydər Əliyev tərəfindən həyata keçirilən uğurlu siyasi-iqtisadi islahatlardan danışıblar. Qeyd olunub ki, bu siyasəti uğurla davam etdirən prezident İlham Əliyev ölkəmizin ekoloji durumunun sağlamlaşdırılmasına da xüsusi diqqət göstərir.

Konfransın sonunda respublikamızın ali təhsil ocaqlarında təhsil alan tələbələr arasında keçirilmiş "Təbii sərvətlərimizə sahib çıxaq, ətraf mühitimizi qoruyaq" adlı məqalə müsabiqəsinin qaliblərini mükafatlandırma mərasimi olub. Mərasimdə məqaləsi birinci yerə layiq görülən tələbəyə 500 manat, ikinci yerin sahibinə 300 manat, üçüncü yeri tutan məqalə müəllifinə isə 200 manat həcmində pul mükafatları və diplomlar təqdim olunub. Bununla yanaşı, 15 nəfər tələbəyə həvəsləndirici mükafat və diplomlar da verilib.

Rufik İSMAYILOV

525-ci qəzet.- 2009.- 6 may.- S.5.