"Bu üç-dörd kəlmə də Süleymanındır..."

XALQ ŞAİRİNİN XATİRƏSİ MUĞAM TEATRINDA YAD EDİLİB

Azərbaycan ədəbiyyatının görkəmli nümayəndələrindən olan xalq şairi Süleyman Rüstəmin xatirə gecəsi keçirilib. Muğam Teatrında təşkil edilən tədbiri giriş sözüylə açan Dini Qurumlarla İş üzrə Dövlət Komitəsinin sədri Hidayət Orucov şairin bütün yaradıcılığı boyu vətənin gözəlliklərindən, doğma xalqın ağrı-acısından, ayrılıq dərdindən, "ikiyə bölünmüş ürəklər"in nisgilindən səmimiyyətlə yazdığını bildirib: "1941-ci ildə Təbrizə səfəri ilə bağlı qələmə aldığı "Təbrizim" şeiri onun yaradıcılığında xüsusi yer tutur, indi də sevilə-sevilə oxunur".

Yazıçılar Birliyinin sədri Anar, akademik Bəkir Nəbiyev, xalq yazıçısı Çingiz Abdullayev və başqaları öz çıxışlarında S.Rüstəmin Azərbaycan şeirinin inkişafında mühüm xidmətləri olduğunu bildiriblər. Çıxış edənlər sənətkarın yaradıcılığında vətən uğrunda müharibə mövzusunun, yeni həyatın və dinc quruculuq işlərinin tərənnümünün ciddi yer tutduğunu vurğulayıblar. Görkəmli şairin İkinci Dünya müharibəsi illərində yazdığı "Ana ürəyi", "Ana və poçtalyon" kimi dəyərli şeirləri ilə xalqı qələbəyə səslədiyi də çıxışlarda xüsusi qeyd edilib.

Şairin oğlu Azad Rüstəmzadə atasının xatirəsinə göstərilən ehtirama görə minnətdarlığını bildirib.

Sonda incəsənət ustalarının ifasında S. Rüstəmin sözlərinə bəstələnmiş mahnılar səslənib.   

Sevinc MÜRVƏTQIZI

525-ci qəzet.- 2009.- 8 may.- S.7.