"Heydər Əliyev və müstəqil Azərbaycan" mövzusunda elmi konfrans keçirilib

Azərbaycan Milli Elmlər Akademiyasının Naxçıvan Bölməsində ulu öndər Heydər Əliyevin anadan olmasının 86-cı ildönümünə həsr olunmuş elmi konfrans keçirilib. Konfransda ilk öncə müstəqil Azərbaycan Respublikasının memarı və qurucusu, ümummilli liderimiz Heydər Əliyevin əziz xatirəsi bir dəqiqəlik sükutla yad edilib.

AMEA Naxçıvan Bölməsinin, Naxçıvan Dövlət Universitetinin, Naxçıvan Müəllimlər İnstitutunun və Naxçıvan Özəl Universitetinin əməkdaşlarının da iştirakı ilə keçirilən elmi konfransı giriş sözü ilə AMEA Naxçıvan Bölməsinin sədri, akademik İsmayıl Hacıyev açıb. O, ulu öndər Heydər Əliyevin müstəqil Azərbaycanın tərəqqisi yolunda gördüyü işlərdən, o cümlədən xalqımız və dövlətimiz qarşısındakı misilsiz xidmətlərindən danışıb. Böyük öndər Heydər Əliyev tərəfindən aparılan daxili və xarici siyasətin uğurlarından söz açan akademik, bu gün Azərbaycanın əldə etdiyi nailiyyətlərdən da bəhs edib. Bildirib ki, Heydər Əliyev siyasəti Azərbaycana çox böyük uğurlar gətirib və bu gün ulu öndərin ölməz ideyaları ölkə başçımız İlham Əliyev tərəfindən də layiqincə davam etdirilir.

Elmi konfransda Naxçıvan Dövlət Universitetinin dosenti, tarix elmləri namizədi Elman Cəfərlinin "Heydər Əliyev müstəqil Azərbaycan Respublikasının memarıdır" mövzusunda geniş məruzəsi dinlənilib.

Natiq çıxışında ulu öndərin "İqtisadiyyatı olmayan ölkənin siyasəti də olmur" sözlərini xatırladaraq qeyd edib ki, hələ yüksək inkişaf və tərəqqinin təməl tarixi olan 1969-cu illərdə ulu öndər ilk növbədə respublikanın iqtisadiyyatının dirçəldilməsinə böyük önəm göstərib. Ümummilli lider həyat və fəaliyyətini doğma xalqına həsr edib söyləyən məruzəçi Heydər Əliyevin müstəqil Azərbaycan naminə həyata keçirdiyi məqsədyönlü siyasətdən danışıb.

"Heydər Əliyevin milli dil siyasəti" mövzusunda çıxış edən AMEA-nın Naxçıvan Bölməsinin İncəsənət, Dil və Ədəbiyyat İnstitutunun direktoru, AMEA-nın müxbir üzvü Əbülfəz Quliyev ümummilli liderin müstəqillik dövründə dövlət dilinin yüksəlişi sahəsində gördüyü işləri diqqətə çatdırıb. O, bildirib ki, 1995-ci ildə Heydər Əliyevin bilavasitə təşəbbüsü və iştirakı ilə dil haqqında geniş müzakirələr keçirilib. Məruzəçi daha sonra Heydər Əliyevin təhsilə verdiyi böyük önəmdən, o cümlədən ulu öndərin orta və ali məktəblərdə Azərbaycan dilinin tədrisinin daha da yaxşılaşdırılması üçün mükəmməl proqram və dərsliklərin tərtibi ilə əlaqədar tövsiyələrindən, fərman və sərəncamlarından bəhs edib. Prezident İlham Əliyevin 2004-cü ildə, eləcə də bundan sonrakı illərdə kiril əlifbasında olan bədii və ictimai-siyasi ədəbiyyatların latın qrafikasına keçirilməsi haqqındakı sərəncamları milli dil siyasətinin həyata keçirilməsi baxımından mühüm əhəmiyyət kəsb edir söyləyən Ə.Quliyev çıxışı zamanı bu gün Azərbaycan dilinin kütləviliyinin təmin edilməsi üçün xarici filmlərin dilimizdə səsləndirilməsinin, dərman preparatlarının Azərbaycan dilində təlimatlarının hazırlanmasının, cib telefonlarına Azərbaycan dilində proqramların yüklənməsinin son nəticədə Azərbaycan dilinin mütəhərriliyinə təkan verdiyini vurğulayıb.

Konfransda ayrı-ayrı mövzularda Naxçıvan Müəllimlər İnstitutunun baş müəllimi Ələkbər Cabbarovun, Naxçıvan Özəl Universitetinin baş müəllimi Əli Yusifovun, AMEA Naxçıvan Bölməsinin Tarix, Etnoqrafiya və Arxeologiya İnstitutunun elmi işçisi Asəf Orucovun məruzələri dinlənilib.

Elmi konfransın sonunda tədbir iştirakçıları "Heydər Əliyev və müstəqil Azərbaycan" adlı sərgidə nümayiş olunan, həmçinin ulu öndərin həyat və fəaliyyətinin müxtəlif məqamlarını özündə əks etdirən kitablarla tanış olublar. Daha sonra yığıncaq iştirakçıları ulu öndərin şərəfli həyat yolundan bəhs edən video görüntüləri izləyiblər.

Türkanə BƏYLƏRLİ

AMEA Naxçıvan Bölməsinin

İnformasiya şöbəsinin əməkdaşı

525-ci qəzet.- 2009.- 8 may.- S.2.