YAP "Heydər Əliyev ideyaları XXI əsrdə. Azərbaycanın inkişaf yolu" mövzusunda elmi-praktiki konfrans keçirdi

Əli Əhmədov: "Azərbaycan Heydər Əliyev ideyalarına əsaslanaraq müstəqil dövlət kimi dünya birliyində öz yerini tutmaqdadır"

Dünən "Gülüstan" sarayında Yeni Azərbaycan Partiyasının (YAP) təşəbbüsü ilə ümummilli lider Heydər Əliyevin anadan olmasının 86 illiyi münasibəti ilə "Heydər Əliyev ideyaları XXI əsrdə. Azərbaycanın inkişaf yolu" mövzusunda elmi-praktiki konfrans keçirildi. YAP-ın icra katibi, millət vəkili Əli Əhmədovun bildirdiyinə görə, Azərbaycan Heydər Əliyevin rəhbərliyi altında uzun illər inkişaf edib. Bu gün də Azərbaycanın inkişafının kökündə Heydər Əliyev ideyaları, onun zəngin irsi dayanır: "Azərbaycan Heydər Əliyev ideyalarına əsaslanaraq müstəqil dövlət kimi dünya birliyində öz yerini tutmaqdadır. Bu istiqamətdə atılan bütün addımlar Heydər Əliyev irsinə söykənir". Ə.Əhmədov əlavə etdi ki, Heydər Əliyev irsi Azərbaycan cəmiyyətini birləşdirən bir dəyərə çevrilib. Bu irs mərkəzləşdirici qüvvə olaraq dövlətçiliyin möhkəmləndirilməsində də öz rolunu oynayır. Heydər Əliyev irsi Azərbaycanın milli-mənəvi zənginliyini təmin edən dəyərlər üçün də baza rolunda çıxış edir. "Azərbaycanın dünəni, bugünü və gələcəyi də Heydər Əliyev ideyaları ilə bağlıdır" - deyə YAP icra katibi vurğuladı. O əlavə etdi ki, son illər Azərbaycan sürətli iqtisadi inkişafa nail olub. Prezident İlham Əliyevin bu istiqamətdə atdığı genişmiqyaslı addımlar özünün də dediyi kimi Heydər Əliyev ideyalarına istinad edir. Çünki Azərbaycanın inkişaf strategiyası məhz ümummilli lider tərəfindən müəyyənləşdirilib: "Azərbaycanın iqtisadi inkişaf tempi bundan sonra da davam edəcək. Bu o deməkdir ki, Azərbaycan XXI əsrdə də Heydər Əliyev ideyalarını yaşadacaq. O, həmişə Azərbaycanın işıqlı gələcəyinin olacağına inanırdı. Onun bu arzusu Azərbaycan cəmiyyətinin də arzusuna çevrilmişdi. Bu arzunun gerçəkliyə çevrilməsi üçün Azərbaycan cəmiyyəti prezident İlham Əliyevin rəhbərliyi altında irəliləməkdədir.

"Azərbaycan Respublikasının Konstitusiyası müasir mərhələdə" mövzusunda çıxış edən Milli Məclis sədrinin birinci müavini, YAP Siyasi Şurasının üzvü Ziyafət Əsgərov qeyd etdi ki, müasir dövrümüzdə Azərbaycanın konstitutsion dövlət kimi təşəkkül tapması, hər şeydən əvvəl ölkədə ictimai-siyasi proseslərlə müşayiət olunan tarixi şərait və bu müstəvidə fəaliyyət göstərən görkəmli siyasi liderlərin dinamik mübarizə xətti ilə bağlıdır. Konstitusiya müasir dövlətin bütöv hüquqi sisteminin özəyi kimi çıxış edən, ölkə vətəndaşlarına əksəriyyətinin maraq dairəsində olan ictimai həyatı və əsas dövlət qurumlarının fəaliyyətini tənzimləyən normativ hüquqi aktdır. Birinci vitse-spiker qeyd etdi ki, Azərbaycanın 1995-ci ildə qəbul edilmiş mövcud Konstitusiyasını hazırlayan komissiyaya məhz ümummilli lider Heydər Əliyev rəhbərlik edib.

YAP Siyasi Şurasının üzvü, Milli Məclisin Aqrar siyasət komitəsinin sədri Eldar İbrahimov "Azərbaycan islahatlar yolunda" adlı məruzə ilə çıxış etdi. Komitə sədri qeyd etdi ki, Naxçıvan Muxtar Respublikasının ağır günlərində buraya gələn ümummilli lider qısa müddət ərzində çox böyük işlər görüb. O, Naxçıvanı ağır vəziyyətdən çıxarmağı bacarıb. İlk növbədə İran və Türkiyə ilə əlaqələr qurub, Muxtar Respublikada təhlükəsizlik və siyasi sabitlik məsələlərini həll edib. Bundan sonra Azərbaycan ictimaiyyətinin müxtəlif təbəqələrini təmsil edən şəxslər Heydər Əliyevin yenidən hakimiyyətə qayıtması üçün müraciətlər etməyə başlayıblar. Naxçıvanda Yeni Azərbaycan Partiyası təsis olunub.

Milli Məclisin Beynəlxalq münasibətlər və parlamentlərarası əlaqələr komitəsinin sədri, Azərbaycanın Avropa Şurası Parlament Assambleyasındakı (AŞ PA) nümayəndə heyətinin rəhbəri Səməd Seyidov Heydər Əliyevin müəyyənləşdirdiyi xarici siyasət kursu barədə məruzə etdi. O qeyd etdi ki, son vaxtlar dünya və dövlətlərarası münasibətlər sürətlə dəyişməyə başlayıb. Bir sıra ölkələrdə sabitlik pozulub, təhlükəsizliklə bağlı problemlər müşahidə olunub. Dəyişikliklər Azərbaycanın yerləşdiyi Cənubi Qafqaz regionundan da yan keçməyib. Gürcüstan-Rusiya münasibətləri pozulub, Ermənistanda prezident seçkilərindən sonra ciddi siyasi gərginlik yaşanıb. Türkiyənin Ermənistanla münasibətləri normallaşdırmaq üçün danışıqlara başlaması regionda yeni geosiyasi vəziyyət yaradıb. S.Seyidov dedi ki, belə bir məqamda Heydər Əliyevin müəyyənləşdirdiyi xarici siyasət fəlsəfəsinin gündəmə gətirib öyrənməyə ehtiyac var. Onun sözlərinə görə, Heydər Əliyevin müəyyənləşdirdiyi xarici siyasət kursu bir neçə əsasa söykənib. Bunlardan birincisi ölkə üçün ən ali marağın milli maraqlar olmasıdır. Bu siyasət hazırda da davam etdirilir. Heydər Əliyev xarici siyasət kursunun ikinci ana xətti böyük dövlətlərin maraqlarının Azərbaycanda toqquşmasına imkan verməmək, əksinə, onları uzlaşdırmaq olub. Üçüncü məqam kimi Heydər Əliyev həmişə ölkənin təhlükəsizliyinin təmin olunması üçün Azərbaycanın dünyadakı təhlükəsizlik sistemlərinin tərkib hissəsinə çevirməyə çalışıb. Dördüncü məqam Azərbaycanın Şərq-Qərb dialoqunda əsas oyunçuya çevrilməsi olub. S.Seyidov qeyd etdi ki, Heydər Əliyevin xarici siyasət kursu bu gün prezident İlham Əliyev tərəfindən uğurla davam etdirilir. Bunun nəticəsidir ki, bu günlərdə dünyanın ən böyük təhlükəsizlik təşkilatı olan NATO-nun baş katibi Yaap de Sxeffer alyansın Azərbaycanın ərazi bütövlüyünü tanıdığını birmənalı şəkildə bəyan edib. Eyni zamanda, BMT-nin Baş Assambleyası da Azərbaycan torpaqlarının işğalı faktını təsdiqləyib. Avropa Şurasının Parlament Assambleyası, QDİƏT PA-da da Dağlıq Qarabağ münaqişəsi mütəmadi olaraq gündəmə gətirilir. S.Seyidov dedi ki, Azərbaycanın apardığı uğurlu xarici siyasət nəticəsində Dağlıq Qarabağ münaqişəsi dünya birliyinin siyasi gündəminə gətirilib. ABŞ-ın dövlət katibi Hillari Klinton, prezident Barak Obama münaqişənin tezliklə həlli üçün bütün gücləri ilə çalışacaqlarını bildiriblər. Komitə sədri onu da bildirdi ki, hazırda Azərbaycan təbii sərvətlərinin satılması məsələsində də milli maraqlara uyğun mövqe tutur. Azərbaycanın nefti və qazı müxtəlif yollarla dünya bazarına çıxarılır. Bir müddət əvvəl gündəmdən çıxmaqda olan Nabukko kəməri layihəsi Azərbaycan prezidentinin qətiyyətli mövqeyindən sonra yenidən müzakirə obyektinə çevrilib.

S.Seyidov onu da bildirdi ki, Azərbaycan bəlkə də dünyanın yeganə ölkəsidir ki, burada ABŞ-la Rusiyanın, İranla Avropanın, Türkiyə ilə Avropa Birliyinin münasibətləri uzlaşdırılır. Onun sözlərinə görə, Azərbaycan neftini və qazını nəql edən Bakı-Tbilisi-Ceyhan, Bakı-Tbilisi-Ərzurum kəmərləri Türkiyənin Avropa Birliyinə inteqrasiyasını sürətləndirib. Bu kəmərlər həmçinin Türkiyənin Yunanıstanla münasibətlərinin istiləşməsinə səbəb olub. "Apardığımız xarici siyasətin nəticəsidir ki, bu gün Azərbaycan hərbçiləri Gürcüstanda keçirilən NATO tədbirlərində iştirak edə bilirlər. Apardığımız siyasətin nəticəsidir ki, bu gün Azərbaycan Barak Obamanın dünyada mətbuat azadlığı ilə bağlı bəyanatında həqiqətə uyğun olmayan fikirlər ifadə etdiyini vurğulaya bilir.

Parlamentin Mədəniyyət komitəsinin sədri, Atatürk Mərkəzinin rəhbəri Nizami Cəfərov "Azərbaycançılıq və Azərbaycanşünaslıq, Əliyevçilik və Əliyevşünaslıq" mövzusunda məruzə etdi. Onun sözlərinə görə, dünyada bir çox ideyalar mövcud olub. Bu ideyaların bir hissəsi praktiklik qazanmır və tarixdə qalır. Bəzi ideyalar isə uzun illər yaşayır və ümumbəşəri xarakter alırlar, elmə çevrilirlər. N.Cəfərovun fikrincə, Heydər Əliyev ideyaları ikincilərdəndir. Hazırda bu ideyaların elmə çevrilməsi istiqamətində müəyyən nüanslar hiss olunmağa başlayıb. Əliyevşünaslığın müəyyən müddəaları artıq məlumdur. Hazırda bu ideyaların sistemləşdirilməsi gedir. Azərbaycanın böyük alimləri Ramiz Mehdiyevin, Seyfəddin Qəndilovun, Yaqub Mahmudovun əsərlərində bu istiqamətdə müəyyən çalarlar formalaşdırılır, - deyə N.Cəfərov qeyd etdi.

Kamil HƏMZƏOĞLU

525-ci qəzet.- 2009.- 8 may.- S.2.