Mədəniyyətimizin hamisi

HEYDƏR ƏLİYEVİN DOĞUM GÜNÜ MƏDƏNİYYƏT VƏ İNCƏSƏNƏT UNİVERSİTETİNDƏ QEYD OLUNUB

Ulu öndər Heydər Əliyevin anadan olmasının 86-cı ildönümü münasibəti ilə Azərbaycan Dövlət Mədəniyyət və İncəsənət Universitetində keçirilən elmi konfrans əslində son dərəcə maraqlı, təsirli məqamlarla müşayiət olunan, real faktlara söykənən tamaşanı xatırladırdı. Ona görə ki, elə H.Əliyevlə bir vaxtda - 1923-cü ildə dünyaya gələn bu ixtiyar təhsil müəssisəsində elmi-pedaqoji fəaliyyətlə məşğul olanların böyük əksəriyyəti ulu öndərlə bilavasitə təmasda olub, nə zamansa onun qərar və sərəncamları ilə yüksək adlara layiq görülüb, fəxri titullarla mükafatlandırılıblar.

Konfransı giriş sözü ilə açan universitetin rektoru, professor Timuçin Əfəndiyev ulu öndərin bir sıra ali keyfiyyətlərini sadalamaqla onun mədəniyyətə olan xüsusi diqqət və qayğısından söhbət açdı, tarixi məqamları yada saldı. ADMİU-da bu dahi şəxsiyyətlə ilgili hər il dəfələrlə qeyd edilən irimiqyaslı tədbirlərin zəruri səbəblərini sadalayarkən çoxsaylı müəllim və tələbə kontingentinin hər gün geniş, işıqlı auditoriyalarında dərs keçdikləri binaya da məhz H.Əliyevin şəxsi göstərişi və yardımı sayəsində sahib olduqlarını vurğuladı.

T.Əfəndiyev daha sonra qeyd etdi ki, H.Əliyev hakimiyyətə gələnə qədər Azərbaycan mədəniyyətinə böyük töhfələr vermiş görkəmli simalardan heç birinə SSRİ-nin ən ali mükafatlarından sayılan Sosialist Əməyi Qəhrəmanı adı verilməyib. Məhz onun respublikaya rəhbər təyin olunduğu illərdə Süleyman Rüstəm, Rəsul Rza, Niyazi, Rəşid Behbudov, Qara Qarayev, Fikrət Əmirov bu yüksək ada layiq görüldü. Beynəlxalq aləmdə kölgəmizi qılınclayanlara, mənəvi dünyamızdan bixəbər olanlara, adımızı pis mənada hallandıranlara bu ən kəsərli cavab idi. Bu, əsl qələbə idi və bu qələbə məhz H.Əliyevin o zamankı SSRİ rəhbərliyi, yüksək çinli məmurları ilə apardığı mücadilələr sayəsində mümkün olmuşdu. Azərbaycanın say-seçmə sənət adamlarının qatıldığı konfransda iştirakçıların hər birində bu törəndə çıxış etmək, ulu öndərlə bağlı ürək sözlərini söyləmək arzusu vardı. Xalq artisti, kinorejissor Oqtay Mirqasımov hələ gənclik illərində ulu öndərin ona göstərdiyi qayğıdan, professor Nizaməddin Şəmsizadə H.Əliyevin çağdaş dünyamızda Azərbaycançılıq ideologiyasının daha geniş vüsət tapmasındakı əvəzsiz rolundan, Əməkdar İncəsənət xadimi, kinoşünas Aydın Kazımov Azərbaycan kinosunun sərhədlərimizdən uzaqlarda tanınması istiqamətində apardığı işlərdən, professor Aqşin Babayev Heydər Əliyevin Azərbaycana rəhbərliyinin ikinci dönəmində onunla birgə işlədiyi vaxtda müşahidə etdiyi yüksək keyfiyyətlərindən, hədsiz diqqətciliyi, fenomenal yaddaşa sahib olmasından, professor Ağakişi Kazımovla xalq rəssamı Ağəli İbrahimov ulu öndərin qibtə olunacaq dərəcədə teatral və rəssamlıq bilgilərinə yiyələnməsindən, bu sahədə çalışan sənətkarlara hədsiz qayğı və ehtiramla yanaşmasından, bir sözlə mədəniyyətimizin hamisi olduğundan söhbət açdılar.

Hüsniyyə

525-ci qəzet.- 2009.- 9 may.- S.25.