Şuşa həsrətinin səhnə təcəssümü nümayiş olunub

"Azərsun Holdinq" şirkətlər qrupunun Mədəniyyət Mərkəzində Şuşanın işğalının 17-ci ildönümünə həsr olunmuş "Ürəyimin şüşəsi Şuşa" adlı anım mərasimi keçirilib. Tədbirin əvvəlində görkəmli sənətkar Xan Şuşinskinin ifasında "Qarabağ şikəstəsi"nin sədaları altında Şuşadan görüntülər nümayiş etdirilib. Giriş sözü ilə çıxış edən Şuşa Teatrının aktyoru Teymur Məmmədov yurdumuzun dilbər guşəsi olan bu şəhərin prezident İlham Əliyevin apardığı məqsədyönlü siyasət nəticəsində tezliklə düşməndən təmizlənəcəyinə əminliyini ifadə edib.

Şuşa rayon rəhbərliyi adından çıxış edənlər işğaldan 17 il keçməsinə baxmayaraq, şuşalıların daima yurd həsrətilə yaşadıqlarını və bu nisgili bir an da unutmadıqlarını, qələbənin çox uzaqda olmadığını vurğulayıblar.

Mərkəzin foyesində Şuşanın tarixi məkanlarını, qədim tikililərini, mədəni-mənəvi dəyərlərini, ziyarətgahlarını, bəxtəvər günlərini əks etdirən fotosərgi açılıb. Sərgi üçün deviz olaraq, ümummilli lider Heydər Əliyevin "Şuşasız Azərbaycan yoxdur!" sözləri seçilib.

Çıxışlardan sonra Aygün Həsənoğlunun "Adsız qadın" əsəri əsasında respublikanın əməkdar artisti Loğman Kərimovun quruluş verdiyi tamaşanın premyerası təqdim olunub. Tamaşanı Şuşa Dövlət Musiqili Dram Teatrının aktyorları ifa ediblər. Əsərdə mənfur ermənilərin təcavüzkarlığı nəticəsində həyatının ən xoş anlarını, övladlarını, ömür yoldaşını, doğma ocağını itirmiş ananın faciəsi öz əksini tapıb. Ana ondan adını soruşan jurnalistə həyəcan və göz yaşı ilə: "Əzizləri öldürülmüş, torpağından qovulmuş qadına nə ad qoymaq olar?"- sualını verir. Tamaşada Ana rolunu respublikanın əməkdar artisti Şükufə Musayeva əsl Şuşa yanğısı, sənət eşqilə canlandırır. Jurnalist obrazını yaradan Etibar Cəfərov isə Vətənin müstəqilliyi uğrunda daim mübarizəyə hazır olan gəncliyi təmsil edir.

Hüsniyyə İSMƏTQIZI

525-ci qəzet.- 2009.- 9 may.- S.23.