"Gənc Ədiblər"in "Ulduz"u parladı

Bu günlərdə "Ulduz" jurnalının aprel sayı işıq üzü görüb. Məlum olduğu kimi, jurnalın budəfəki nömrəsi Gənc Ədiblər Məktəbi (GƏM) üzvlərinin ixtiyarına verilib. "Ulduz" jurnalının baş redaktor müavini şair Qulu Ağsəsin "Yazılarından balaca və böyük uşaqlar" adlı önsözü ilə açılan bu sayda gənclərin bədii yaradıcılıq nümunələri həm "Poeziya", həm də "Proza" bölməsində təqdim olunub.

İlk bölümdə Fərhad Mete, Feyziyyə, Əli, Qismət, Aysel Əlizadə, Vüsal Nuru, Anar Amin, Elnaz Eyvazlı, Fərid, Cahad Göyçəli, Bahadur, Aysel Əliyeva, Leyla Şərifova, Mirbəhram Əzimbəyli, Günel Eminli, Vəlixan Abdullayev, Günel Rüstəmova, Aytən Təhmasib, İlkin Nadirov, Günay və Rəbiqənin şeirləri yer alıb.

GƏM-in üzvü Elnura Cavadzadənin "Vaxtında deyək" publisistik yazısı "Gənc Ədiblər"in rəhbəri, Yazıçılar Birliyinin katibi Rəşad Məcidə həsr olunub. Müəllif R.Məcidin gənc qələm sahiblərinə göstərdiyi diqqət və qayğıdan səmimiyyətlə söz açıb. "Biz sizdən öyrənirik" yazan E.Cavadzadə AYB katibinin gənclərdə "özünəinam formalaşdıra biləcək qədər güclü" olduğunu önə çəkib.

Jurnalın "Proza" bölməsində Elxan Qaraqanın "Damdan aşağı", "Şeytanın duası", "Soyuducudan məktub", Cavid Zeynallının "Yazıçı və "Koka-kola", "Səfər", Ülviyyə Heydərovanın "Xəzərin dostları", "Ana və uşaq", Nahidin "Dəmir qapı", "Bu hekayəni oxumağa qorxdular", "Ulduza dönən adam", Ziyad Quluzadənin "Xoş və utanc dolu gecə", Səməd Səfərovun "Afrikasayağı xaçapuri", Sevinc Mürvətqızının "Bağlı qapıların ardı", Elbrus Ərudun "Əhli və Ağabəyim", "Qaz yumurtası", Zərdüşt Səksənaltının "Mahmudsuzluq" və Orxan Muxtarlının "Həyatın qanunu" hekayələri işıq üzü görüb.

Sevinc MÜRVƏTQIZI

525-ci qəzet.- 2009.- 9 may.- S.23.