"Ölkəm"in bəstəkarının xatirəsi anılıb

MUSİQİ İCTİMAİYYƏTİ ASƏF ZEYNALLININ 100 İLLİYİNİ QEYD EDİB

Müslüm Maqomayev adına Dövlət Filarmoniyasında Mədəniyyət və Turizm Nazirliyinin, Bəstəkarlar İttifaqının birgə təşkilatçılığı ilə görkəmli bəstəkar, milli romans janrının banisi Asəf Zeynallının 100 illiyinə həsr olunmuş yubiley gecəsi keçirilib.

Mərasimdə çıxış edən professor Ramiz Zöhrabov ölməz bəstəkar A.Zeynallının qısa, amma mənalı yaşanan ömür yolundan, yaradıcılığının əhəmiyyətindən söz açıb: "1909-cu ildə Dərbənddə dünyaya göz açan A.Zeynallı 1929-1931-ci illərdə Bakı Türk İşçi Teatrında musiqi şöbəsinin müdiri və Azərbaycan Proletar Musiqiçiləri Birliyinin sədri işləyib. Qara Qarayev və Tofiq Quliyev kimi tanınmış bəstəkarlar bir müddət onun tələbəsi olublar. Azərbaycan musiqi tarixində ilk romanslar məhz Asəf Zeynallının adı ilə bağlıdır".

Gecədə çıxış edənlər bəstəkarın Bakı Türk İşçi Teatrında oynanılan bir çox əsərlərə musiqi bəstələdiyini, "Uşaq süitası" əsəri ilə ilk dəfə Azərbaycan musiqi tarixində uşaq musiqisi repertuarının əsasını qoyduğunu bildiriblər. A.Zeynallının bir neçə xalq mahnısını nota saldığı da tədbirdə qeyd edilib.

Mərasimə toplaşanlar əsərləri indi də sevilə-sevilə oxunan və dinlənilən bəstəkarın xatirəsinin daim yaddaşlarda yaşayacağına əminliklərini dilə gətiriblər.

Gecədə əməkdar incəsənət xadimi Fəxrəddin Kərimovun dirijorluğu ilə Ü.Hacıbəyov adına Dövlər Simfonik Orkestrinin, müxtəlif musiqi kollektivlərinin ifasında A.Zeynallının əsərləri səsləndirilib.  

SARA

525-ci qəzet.- 2009.- 9 may.- S.23.