Heydər Əliyevin 86 illiyi Bakı Slavyan Universitetində də qeyd edilib

Dünən Bakı Slavyan Universitetində (BSU) ümummilli lider Heydər Əliyevin 86-cı doğum günü münasibətilə tədbir keçirilib. Tədbirdə çıxış edən BSU-nun rektoru, professor Kamal Abdulla deyib ki, Heydər Əliyevin həyata keçirdiyi daxili və xarici siyasət nəticəsində indi Azərbaycan yüksək templə irəliləyən və iqtisadi cəhətdən qüdrətli ölkəyə çevrilib: "Heydər Əliyev apardığı məqsədyönlü siyasət sayəsində Azərbaycanı bütün dünyaya tanıtdı".

Moskva Dövlət Linqvistika Universitetinin "Azərbaycan dili və ədəbiyyatı" mərkəzinin rəhbəri B.Musayeva vurğulayıb ki, bu mərkəzin açılması ümummilli liderin Azərbaycanın beynəlxalq aləmdə təbliğinə layiqli töhfə və bu böyük işin mühüm tərkib hissəsidir.

Yeni Azərbaycan Partiyasının nümayəndəsi Oqtay Səmədov qeyd edib ki, çağdaş milli ideologiyanın banisi olan H.Əliyev dünya siyasi məkanında özünəməxsus yer tutub. Bütün dünya siyasətçiləri onun dərin zəkası, intellekti və yürütdüyü siyasət haqda yüksək fikirlər söyləyiblər.

Universitetin müəllimləri Məmməd Qocayev, Habil Məmmədov da H.Əliyevin həyatı və fəaliyyəti barədə fikirlərini bölüşüblər.

Tədbirin sonunda "Heydər Əliyev məktəbi" tələbə teleradio studiyasının rəhbəri Etibar Babayevin H.Əliyevin həyat və yaradıcılığına həsr edilmiş "Zirvə" filmi nümayiş olunub.

S.QARAYEVA

525-ci qəzet.- 2009.- 9 may.- S.3.