Milli Elmlər Akademiyasında Məmməd Cəfər Cəfərov yad edilib

Milli Elmlər Akademiyası (AMEA) Rəyasət Heyətinin binasında görkəmli ədəbiyyatşünas alim akademik Məmməd Cəfər Cəfərovun 100 illik yubileyilə bağlı elmi sessiya keçirilib. AMEA-dan verilən məlumata görə, burada alimin həyat və yaradıcılığı ilə bağlı sərgi də açılıb.

Akademiyanın prezidenti Mahmud Kərimov 83 illik ömrünün 60 ilini ölkəmizdə ədəbi-nəzəri fikrin inkişafına həsr edən alimin həyat və yaradıcılığından, XIX əsr rus ədəbiyyatının Azərbaycan oxucusuna çatdırılmasında əvəzsiz xidmətlərindən danışıb.

Professor Nizaməddin Şəmsizadənin "Ədəbi-ictimai fikrimizin patriarxı" adlı məruzəsi Məmməd Cəfər Cəfərovun çoxşaxəli və məhsuldar elmi fəaliyyətindən bəhs edib: "Məmməd Cəfər 1937-ci il repressiyasından sonra ədəbi tənqidə "ikinci növ ədəbiyyat" kimi baxan, redaksiyalarda tənqidi məqalələri qovluğunda saxlayan yazıçılara və naşirlərə sübut edib ki, ədəbi tənqid çox çətin və dəyərli sənətdir. Əgər yazıçı özündən, ovqatından asılı olursa, tənqidçi həm özündən, həm bədii əsərdən, həm də zəmanənin estetik zövqündən asılı peşə sahibidir".

Şirindil Alışanovun "M.C.Cəfərovun nəzəri-estetik görüşləri" adlı məruzəsində, akademiklər Bəkir Nəbiyevin, İsa Həbibbəylinin, professor İsrafil İsrafilovun çıxış və xatirələrində də mərhum alimin xidmətləri yüksək qiymətləndirilib.

S.MÜRVƏTQIZI

525-ci qəzet.- 2009.- 13 may.- S.7.