Ümummilli lider Heydər Əliyevin anadan olmasının 86-cı ildönümü Xızı rayonunda da qeyd edilib

Beynəlxalq Diaspor Mərkəzinin (BDM) təşkilatçılığı ilə Xızı rayonunun Altıağac qəsəbəsində ümummilli lider Heydər Əliyevin anadan olmasının 86-cı ildönümü münasibətilə mədəni-kütləvi el şənliyi keçirilib. Mərasimdə BDM-in sədri İsmayıl Ağayev çıxış edərək ulu öndər Heydər Əliyevin Azərbaycan xalqı qarşısındakı əvəzolunmaz xidmətlərindən danışıb. O, qeyd edib ki, "xalqlar həbsxanası" adlandırılan keçmiş SSRİ-də slavyan xalqları qanunpərəst, gürcülər vətənpərvər, ermənilər daha çox ruslara sadiq xalq kimi tanındığı vaxtda azərbaycanlılara qarşı ögey münasibət bəslənib. Onun sözlərinə görə, 1969-cu ildə Azərbaycan rəhbərliyinə ümummilli lider Heydər Əliyevin gəlməsi bu stereotipi təfəkkürlərdən birdəfəlik silib: "Ulu öndər Heydər Əliyevin idarəçiliyi dövründə Azərbaycan Respublikası daha da inkişaf edib. Çoxsaylı azərbaycanlının dövlət işlərinə cəlb olunması nəticəsində isə xalqımızın ictimai, elmi, ziyalı elitar təbəqəsi formalaşıb. Bütün bunlarla yanaşı ulu öndər Heydər Əliyev hələ sovet dönəmində xalqımızın, dövlətimizin bütövlüyünü təşkil edən ideologiyanın bünövrəsini qoyub. Məhz bu xidmətlərinə görə də, torpaqlarımızın 20 faizinin Ermənistan tərəfindən işğal edildiyi və vətəndaş müharibəsinin başladığı bir zamanda xalq düzgün seçim edərək millətimizin gələcəyi naminə yorulmadan fəaliyyət göstərən ulu öndər Heydər Əliyevi yenidən hakimiyyətə dəvət edib. Bununla da, ölkədə bütün narahatlıqlara, həyəcanlara son qoyulub. Həmin tarixdən etibarən müstəqil Azərbaycan Respublikasının inkişafı naminə müxtəlif sahələri əhatə edən genişmiqyaslı islahatlara start verilib, ölkəmiz yeni həyata qədəm qoyub. Eyni zamanda müxtəlif ölkələrə səpələnmiş azərbaycanlıların vahid ideologiya, bir məqsəd ətrafında təşkilatlanması üçün də əməli tədbirlər görülməyə, o cümlədən uzunmüddətli perspektivlərə hesablanmış siyasət yürüdülməyə başlanılıb".

Beynəlxalq Diaspor Mərkəzinin Avropa nümayəndəsi Azər Kərimov çıxışı zamanı ulu öndərin ölkəmizdən kənarda yaşayan həmyerlilərimizə göstərdiyi diqqət və qayğıdan danışıb. Bildirib ki, ümummilli lider Azərbaycan prezidenti kimi rəsmi və işgüzar səfərləri çərçivəsində həmişə xaricdə yaşayan azərbaycanlılarla görüşərək onların problemləri, həmçinin də fəaliyyətləri ilə tanış olub, soydaşlarımızı Azərbaycanda investisiya layihələrində iştirak etməyə dəvət edib: "Ulu öndər Heydər Əliyev müstəqil Azərbaycanın sivil bir dövlətə çevrilməsi, qarşısında duran problemlərin həll olunması, qanunun aliliyinin təsbit olunduğu demokratik, hüquqi və dünyəvi dövlət kimi inkişaf etməsi üçün bütün dünya ölkələrindəki soydaşlarımızın həmrəyliyinə nail olmaq kimi çətin bir missiyanı üzərinə götürmüşdü. Məhz Heydər Əliyevin produktiv fəaliyyəti, qayğısı və böyük diqqəti sayəsində xaricdə yaşayan soydaşlarımız Azərbaycanın milli maraqları uğrunda daha əzmlə fəaliyyət göstərməyə başlamış, doğma vətənləri ilə əlaqələrini möhkəmləndirmiş, ölkəmizin dövlət quruculuğu prosesində yaxından iştirak etməyə və burada gördükləri real həqiqətləri bütün dünyaya yaymağa başlamışlar".

Mərasimdə professor Vaqif Arzumanlı, Beynəlxalq Diaspor Mərkəzinin Rusiya Federasiyasındakı nümayəndəsi Ələmdar Nəbiyev və başqaları da çıxış edərək ulu öndərin həyat və fəaliyyətindən danışıblar.

Sonra ümummilli liderin anadan olmasının 86 ildönümü münasibətilə Altıağac qəsəbəsindəki gənclərin iştirak etdiyi at yarışı keçirilib. Yarışın şərtlərinə görə müəyyən edilmiş məsafəni birinci olaraq qət edən yarışçıya pul mükafatı və Şəmistan Əlizamanlının vətənpərvər mahnılardan ibarət "Mən fəxr edirəm ki, Azərbaycanlıyam" adlı diski hədiyyə edilib. Daha sonra mərasim tanınmış müğənni və xanəndələrin ifasından ibarət konsert proqramı ilə davam etdirilib.

Rufik İSMAYILOV

525-ci qəzet.- 2009.- 13 may.- S.2.