Ərəbyengicə" adlı kitab işıq üzü görüb

AMEA Naxçıvan Bölməsinin Tarix, Etnoqrafiya və Arxeologiya İnstitutunun şöbə müdiri, AMEA-nın müxbir üzvü Vəli Baxşəliyev və Azərbaycan Dövlət İqtisad Universitetinin professoru, tarix elmləri doktoru Abbas Seyidovun birgə hazırladıqları "Ərəbyengicə" adlı kitab bu yaxınlarda işıq üzü görüb. Bakıda "Nurlan" nəşriyyatında akademik İsmayıl Hacıyevin elmi redaktorluğu ilə nəşr edilən kitabda ərazisi qədim tarixə malik olan Şərur rayonunun Ərəbyengicə kəndinin tarixindən, qədim yaşayış yerinin coğrafi mövqeyindən, habelə qazıntılar zamanı aşkar olunan materialların geniş texnoloji və tipoloji təhlilindən bəhs olunur.

Naxçıvan Muxtar Respublikasının 85 illik yubileyinə həsr olunan monoqrafiyada ötən il qədim yaşayış yerində aparılan arxeoloji qazıntılar zamanı aşkar olunan maddi-mədəniyyət nümunələri müəlliflər tərəfindən elmi cəhətdən təhlil edilib, Kür-Araz mədəniyyətinin mənşəyi ilə bağlı məsələlər araşdırılaraq onların qarşılıqlı əlaqələri göstərilib.

Qeyd edək ki, "Yaşayış yerinin Coğrafi mövqeyi", "Arxeoloji materialların texnoloji və tipoloji təhlili", "Arxeoloji materialların Azərbaycan arxeologiyasında yeri və əhəmiyyəti", "Eneolit mədəniyyətinin izləri və Kür-Araz mədəniyyətinin mənşəyi" adlı başlıqlar qədim yaşayış yerlərinin bəzi qaranlıq səhifələrini ətraflı şəkildə işıqlandırır.

Qədim yaşayış yerinin tarixinin öyrənilməsi sahəsində böyük rol oynayacaq monoqrafiyada rəngli foto şəkillər və qrafiq təsvirlər də verilib.

Məlumat üçün onu da qeyd edək ki, üç dildə-Azərbaycan, rus və ingilis dillərində nəşr olunan kitab tədqiqatçılar, tələbələr və geniş oxucu kütləsi üçün nəzərdə tutulub.

Türkanə BƏYLƏRLİ,

AMEA Naxçıvan Bölməsinin

İnformasiya şöbəsinin əməkdaşı

525-ci qəzet.- 2009.- 19 may.- S.2.