Rəsul Rza Mükafatı yeni laureatlara təqdim edilib

Ötən gün Yazıçılar Birliyində (AYB) Beynəlxalq Rəsul Rza Mükafatının təqdimat mərasimi keçirilib. Rəsul Rza Fondunun prezidenti xalq şairi Fikrət Qoca mükafatın hər il mayın 19-da - R.Rzanın doğum günündə təqdim edildiyini nəzərə çatdırıb. F.Qoca mərhum xalq şairinin Azərbaycan ədəbiyyatının, milli poeziyanın inkişafındakı müstəsna rolundan söz açıb.

Millət vəkili, professor Rafael Hüseynov R.Rzanın ədəbiyyat tarimizdəki yüksək mövqeyindən danışaraq, onun hər zaman yaradıcı gənclərə böyük qayğı ilə yanaşdığını vurğulayıb. R.Hüseynov R.Rzanın adını daşıyan mükafata layiq görülməyin qürurverici hal olduğunu diqqətə çatdırıb.

"Vektor" Beynəlxalq Elm Mərkəzinin rəhbəri şair Elçin İsgəndərzadə R.Rza poeziyasının zənginliyi və şəxsiyyətinin böyüklüyü barədə fikirlərini bölüşüb.

Qeyd edək ki, Rəsul Rza Mükafatının laureatları sırasında bu il Yusif Seyidov, Oqtay Rza, Cəmil Həsənli, Rübail, Adil Şirin, Əkbər Qoşalı, Mövlud Teymur, Natiq Qubadoğlu kimi elm və ədəbiyyat adamlarının adları yer alıb. Gənc yazarlar Ülviyyə Heydərova və Rəbiqə Nazimqızıya isə Rəsul Rza adına Fondun "Ümid işığı" mükafatı təqdim olunub.

Mərasimdə çıxış edən laureatlar Rəsul Rza Mükafatına layiq görüldükləri üçün çox sevindiklərini dilə gətiriblər. Profesor C.Həsənli R.Rzanın böyük şair olmaqla yanaşı, xalqın taleyi və tarixi ilə bağlı irimiqyaslı işlər gördüyünü söyləyib. Gənc şairə R.Nazimqızı Yazıçılar Birliyinin gənc yazarlara ciddi qayğı ilə yanaşdığını önə çəkib. Mükafatçılardan Oqtay Rza və Mövlud Teymur Rəsul Rzaya həsr etdikləri şeirləri oxuyublar.

Yazıçılar Birliyinin sədri Anar mükafatçıları təbrik edərək, onlar gələcək fəaliyyətlərində daha böyük uğurlar arzulayıb.

Mərasimdə Türk Dünyası Görkəmli Ədəbiyyat və Sənət Adamları Cəmiyyətinin rəhbəri Əminə Sevinc Öksüzoğlu "Türk Dünyası Ədəbiyyatı Şərəf Ödülü"nü xalq yazıçısı Anara təqdim edib.

Sevinc MÜRVƏTQIZI

525-ci qəzet.- 2009.- 20 may.- S.7.