"Sözün müqəddəsliyi
mənim üçün
həmişə yüksəkdə
dayanıb"
GÜLAYƏ ŞINIXLI:
"SÖZ ADAMLARININ TƏMASLARI İLƏ MÖHKƏMLƏNƏN
DOSTLUQ TELLƏRİ TÜRK DÜNYASI XALQLARINI DAHA DA
DOĞMALAŞDIRIR"
Şairə Gülayə
Şınıxlı (Rzayeva) 1964-cü ildə Gədəbəyin
Düzrəsullu kəndində dünyaya gəlib. Orta təhsilini
doğma rayonda alan G.Şınıxlının şeirləri
1992-ci ildən Azərbaycan Radiosu və Televiziyasında səslənib.
Şairənin tamaşaçı və oxucularla ilk
görüşü Azərbaycan Televiziyasında uzun illər
yayımlanan "Aşıq Pəri Məclisi"
proqramında olub. Sonralar G.Şınıxlı AzTV-də
"Sazın-sözün sehrində" proqramına
aparıcılıq edib. Şairə Orta Asiya və Türkiyədə
bir sıra poeziya axşamlarında, şeir müsabiqələrində
iştirak edərək mükafatlara layiq görülüb. G.Şınıxlının
"Ay mənim gözləri kor məhəbbətim",
"Bir şair yaşayır qəmin içində",
"Gəlmişəm ki, deyəm, gəlməyəcəyəm",
"Zaman ağlatdı məni", "Atatürkü
görürəm" kitabları nəşr edilib. Bundan
başqa, şeirləri müxtəlif antologiyalarda da yer
alıb. "İlqarımda ilqarsıza uduzdum", "Gizlətmişəm
gülə-gülə dərdimi", "Məni sənsizliyə
sən öyrətmisən", "Ömrümün
laylaları" adlı albom-kasetlərdə onun şeirləri
toplanıb.
Bu il yubiley
yaşını qeyd edən şairə bizimlə söhbətində
həm ümumən yaradıcılığından, həm də
indiyədək qatıldığı festival və müsabiqələrdən
danışdı, o cümlədən bu yaxınlarda
gerçəkləşən İraq səfərinin təəssüratlarını
bölüşdü.
- Poeziyaya
marağınızı ilk öncə nə vaxt hiss etdiniz?
- Söhbətimizə
başlamazdan öncə oxucuları şeirimdən bir
parça ilə salamlamaq istərdim:
Nə ucuz
tut onu, nə yarıda qır,
Salamdan
bahalı bəxşiş varmıdır?
Salam
yaradana ehtiramımdır,
Əzəli-əbədi
qüdrətli hakim –
Salaməleyküm!..
Mənim şeirlə
ilkin salamlaşmam lap kiçik yaşlarıma təsadüf
edir. Orta məktəbdə oxuduğum illərdə
yazdığım şeirlər respublikanın bir sıra qəzet
və jurnallarında çap olunub. Əslində həmişə
yazdıqlarımı "cızmaqara" adlandırıram.
Sadəcə mən də hamı kimi yazıram. Amma yazmaq mənim
həyatımın mənasıdır. Ədəbiyyata olan
sonsuz həvəsim mənim bu sahəyə üz
tutmağıma səbəb olub. Sözün müqəddəsliyi
mənim üçün həmişə yüksəkdə
dayanıb və hər zaman belə olacaq.
- Siz bir sıra şeir
müsabiqələrində iştirak etmisiniz və
mükafatlara layiq görülmüsünüz. Bu barədə
bir qədər ətraflı məlumat verməyinizi istərdik.
- Müxtəlif vaxtlarda
Türkiyədə türkdilli xalqların saz-söz
festivallarında iştirak etmişəm. Keçən il
Türkiyənin Konya şəhərində də
Uluslararası Şeir Axşamlarına dəvət
almışdım. Ötən ilin yayında da qardaş
ölkənin Bursa şəhərində 18 ölkə
yazarlarının iştirakı ilə keçirilən
türk dünyası aşıqlarının və şairlərinin
yarışmasına qatıldım. Heç gözləmədiyim
halda həmin müsabiqədə birinciliyə layiq
görüldüm və məni "Cümhuriyyət
qızılı" medalı ilə təltif etdilər.
- Bu il aprelin
sonlarında İraqa səfər etmisiniz. Səfər təəssüratlarınız
əsasən nələrdən ibarətdir?
- Məni İraqa
tanınmış Kərkük şairi Şəmsəddin
Kuzəçi dəvət etmişdi. Səfər
İraqın gənclik və idman naziri Qasim Muhammed Cafer,
türkmən millət vəkili Fevzi Ekrem Terzioğlunun təşəbbüsü
və təşkilatçılığı ilə
gerçəkləşdi. Bu səfərdə əsas məqsəd
dahi Azərbaycan şairi Məhəmməd Füzuliyə həsr
olunmuş simpoziumda iştirak etmək idi. Dövlət səviyyəsində
keçirilən bu tədbirdə şeirlərimlə
çıxış etdim. Bildiyiniz kimi, İraq müharibə
vəziyyətində olan bir ölkədir. Hər tərəfdə
şəhid məzarlığı var. Hətta maşın qəbiristanlığına
da rast gəldik. İraqın Nəcəf, Kərbəla və
Bağdad şəhərlərində olduq. Bu şəhərlərdə
gəzdikcə adamın ürəyi göynəyir. Hər
şeydən öncə mən anayam, müharibə
olmasını istəmirəm. İraqda isə hər tərəfdə
amansız müharibənin izləri görünür. Bu, əlbəttə,
İraqda həyatın bütün sahələrinə təsir
edib. Amma iraqlılarda ruh var, yenidən tikib-qurmaq əzmi, gələcəyə
ümidləri yaşayır. Bütün faciələrinə,
axıdılan qanlara baxmayaraq, onlar şeirə, sənətə
də diqqət və qiymət verməyə macal tapırlar. Kədərli
təəssüratlarıma baxmayaraq, İraqa səfərimdən
çox məmnun qaldım. Çünki biz Füzuli
sözünün səcdəsinə, böyük bir adın
işığına yığışmışdıq.
- Sizcə, bu səfərlər
yaradıcılığınıza və ümumiyyətlə,
qardaş türk ölkələri arasında mədəni-ədəbi
əlaqələrə nə kimi təsir göstərir?
- Bu səfərlərdə
qardaş türk ölkələrinin şairləri,
yaradıcı insanları ilə əlaqələrimiz qurulur,
ünsiyyətimiz yaranır. Bunlar,əlbəttə ki, bir qələm
adamı kimi mənim yaradıcılığıma və
dünyagörüşümə çox müsbət təsir
göstərir. Xüsusilə keçən ilin oktyabr
ayında Altundağ bələdiyyəsinin və Nəcib
Fazil Qısakürək Mədəniyyət Mərkəzinin təşəbbüsü
ilə keçirilən şeir axşamı yaddaşıma
gözəl təəssüratlarla həkk olunub. "Altundağda
şeir axşamı" adlı həmin tədbir artıq
dördüncü dəfə idi ki, keçirilirdi. Həmin
görüş TRT kanalında bir proqram şəklində də
yayımlanıb. O proqramda Türkiyənin məşhur
şairləri Abdurrahim Karakoç, Faruk Faik
Köprülü, Hilmi Yavuz, Nurullah Genç, Semih Sergen, Yavuz
Bülənt Bakiler kimi dəyərli söz adamları ilə
bir araya gəldik və türk dünyasının söz aləmi
haqqında fikirlərimizi, düşüncələrimizi
paylaşdıq. Tədbirin əsas təşkilatçılarından
biri də Türkiyənin tanınmış yazarlarından
biri Mehmet Nuri Barmaksız idi. Bu proqram çərçivəsində
məşhur türk yazarı professor İsa Kayacanla
görüşmək də mənə nəsib oldu. Belə
görüşlər məni çox sevindirir. Çünki
bu, əbədi və sarsılmaz qardaşlığın
gözəl bir örnəyi idi. Yavuz Bülənt Bakilerin Azərbaycana
həsr etdiyi şeirlər də bunun ifadəsidir:
Azərbaycan
ürəyimdə bir şah
damardır...
Ayətdir
kitabımda,
bayrağımda
rüzgardır...
Bu hissləri
qarşılıqlı şəkildə bir-birimizə
anlatmaq üçün türkdilli xalqların söz
adamları olaraq, hər zaman bir yerə
toplaşmağımıza, müntəzəm
görüşməyimizə ehtiyac var. Çapa
hazırlanmaqda olan sonuncu kitabımdakı şeirlərdə
də bu duyğular əsas yer tutur:
Yerimlə,
göyümlə, xoş sabahımla,
Göylər
səyyarəsi səma şahımla,
Təmkini-təqdirəm
öz Allahımla,
Əzəli-əbədi
vəhdətimdir söz.
Gülayə,
bir vicdan gəzir qanımda,
Haqqa
tapınmışam hər bir anımda,
Almışam
mən həyat imtahanımda,
İnsanam, ən ali qiymətimdir
söz.
Əminəm ki, söz
adamlarının təmasları ilə möhkəmlənən
dostluq telləri Türk dünyası xalqlarını daha da
doğmalaşdırır. Bu görüşlər xüsusən
Azərbaycan-Türkiyə münasibətləri
baxımından böyük önəm kəsb edərək,
ümummilli liderimiz Heydər Əliyevin dediyi kimi, "Bir millət-iki
dövlət" həqiqətini əbədiləşdirir.
Sevinc MÜRVƏTQIZI