Atatürk Mərkəzində Əhməd bəy Ağaoğlunun 140 illiyinə həsr olunan tədbir keçirilib

Dünən Atatürk Mərkəzində Qarabağ Azadlıq Təşkilatının (QAT) təşəbbüsü ilə ictimai xadim, jurnalist, pedaqoq və yazıçı Əhməd bəy Ağaoğlunun anadan olmasının 140 illiyinə həsr olunan tədbir keçirilib. APA-nın məlumatına görə, tarixçi-alim Firdovsiyyə Əhmədova Ə.Ağaoğlunun fəaliyyəti haqda danışıb. F.Əhmədova bildirib ki, Ə.Ağaoğlu Azərbaycanda milli-istiqlal məfkurəsinin formalaşmasında əməyi olan şəxsiyyətlərdəndir. Ə.Ağaoğlunun Mustafa Kamal Atatürklə olan münasibətlərinə də toxunan F.Əhmədova deyib ki, Türkiyə Cümhuriyyətinin formalaşmasında da onun rolu az deyil. QAT sədri Akif Nağı Ə.Ağaoğlunun Azərbaycanın müstəqilliyi istiqamətində apardığı mübarizəyə diqqəti çəkib. QAT sədrinin sözlərinə görə, Ə.Ağaoğlu həm Türkiyənin, həm də Azərbaycanın aydın ziyalılarından olaraq, türk millətinin inkişafı istiqamətində ciddi iş aparıb. Sonra tədbir alim və ziyalıların mövzu haqda çıxışları ilə davam etdirilib.

Qeyd edək ki, Əhməd bəy Ağaoğlu 1869-cu ildə Şuşa şəhərində anadan olub. O, Sankt-Peterburqda və Parisin Sorbonn Universitetində təhsil alıb. "Difai" təşkilatına rəhbərlik edib. Osmanlı İmperiyasında "Gənc Türk" hərəkatının üzvü, "Türk Ocağı" Türk Milli Hərəkatının prezidenti olub. 1915-ci ildə Osmanlı Məclisi Məbusanına (Millət Məclisi) Afyon nümayəndəsi olaraq seçilib. 1918-ci il Azərbaycan Xalq Cümhuriyyətinin Milli Məclisinin deputatı olub. Azərbaycanda sovet hökuməti qurulduqdan sonra isə Türkiyəyə dönən Ə. Ağaoğlu "Hakimiyyəti-Milliyə" qəzetinin baş redaktoru, Türkiyə Cümhuriyyətinin banisi Mustafa Kamal Atatürkün məsləhətçisi olub. Ə. Ağaoğlu 1939-cu ildə Türkiyədə vəfat edib.

525-ci qəzet.- 2009.- 21 may.- S.3.