İsmayıllıda Qalalar günü təntənəylə qeyd edilib

Mayın 10-da ümummilli lider Heydər Əliyevin doğum günündə qədim Cavanşir yurdu İsmayıllıda möhtəşəm bir bayram təntənəsi vardı.

Səhər tezdən ulu öndərin abidəsi önünə gül dəstələri qoyan rayon ictimaiyyətinin nümayəndələri və qonaqlar "Ormanlar içində duran Talıstan"dan 3-4 km yuxarıda olan VII əsrin möhtəşəm tarixi-memarlıq abidəsi Cavanşir qalasına yürüşə başladılar.

Bu yerlər ulu Cavanşirdən üzübəri, yəqin ki, belə qələbəlik, bu cür təmtəraq görməmişdi. Elə bil Cavanşir növbəti qələbələrindən birini qeyd edirdi. Qala divarlarının altında səngər yeri deyilən talalarda çadırlar qurulmuşdu, tonqallar qalanmışdı, qazanlar asılmışdı, məşəllər alovlanırdı. Cavanşir cəngavərlərini xatırladan yüzlərlə İsmayıllı sakini, məktəblilər əllərində bayraqlar tutaraq, qara zurnaların sədaları altında dar cığırlardan keçib qalanın ziyarətinə tələsirdilər. Göz önündəki mənzərə bu misralarla yaxından səsləşirdi:

   Cavanşir qalası... üstü duman, çən,

   Küləklər şəninə nəğmələr qoşar.

   Tarix kitabında yazıya dönən,

   Torpağın üstündə qala tək yaşar.

Bir etnoqrafiya muzeyi idi Cavanşir yurdu o gün. Qocaman palıdlardan, cökələrdən Cavanşir dövrünə aid yaraq-yasaqlar, qədim milli-məişət əşyaları asılmışdı.

Bu möhtəşəm el şənliyinin təşəbbüsçüsü və təşkilatçısı olan İsmayıllı rayon icra hakimiyyətinin başçısı Nizami Ələkbərov tədbiri açaraq, iştirakçıları salamladı. N.Ələkbərov qeyd etdi ki, milli dəyərlərimizə, tarixi keçmişimizə böyük hörmət və diqqətlə yanaşan ümummilli lider Heydər Əliyevin 86-cı ildönümü münasibətilə düzənlənən bu el bayramı öndərə olan sonsuz hörmət və ehtiramın təzahürüdür. O bildirdi ki, tarixi abidələr və qalalarla zəngin olan İsmayıllı torpağında bu ənənə hər il davam etdiriləcək.

Tarix elmləri doktoru Qafar Cəbiyev qədim Alban mədəniyyəti və həmin mədəniyyətin tərkib hissəsi olan Cavanşir qalası haqqında toplantı iştirakçılarına geniş məlumat verdi.

Nəğməkar şair, əməkdar incəsənət xadimi Baba Vəziroğlu, şair Maarif Soltan, telejurnalist Elçin Əlibəyli, yerli qəzetin redaktoru Şahməmməd Dağlaroğlu, hüquqşünas Simran Həsənov və başqaları belə tədbirlərin böyük əhəmiyyət daşıdığını vurğuladılar.

Məclisi el sənətkarları Aşıq Yanvar, Aşıq Cavid, Aşıq Elman, müğənnilərdən İsmayıl Abbasov, Aytən Məhərrəmli, Sahibə Abdullayeva və başqaları davam etdirdilər.

Nəriman QƏNİYEV

525-ci qəzet.- 2009.- 22 may.- S.7.