IX Bakı Kitab Bayramı keçirilib

Dünən M.F.Axundov adına Milli Kitabxanada IX Bakı Kitab Bayramı təşkil edilib. Tədbir Yeni Yazarlar və Sənətçilər Qurumunun (YYSQ) təşkilatçılığı, Mədəniyyət və Turizm Nazirliyinin, Yazıçılar Birliyinin təşkilati, Gənclər və İdman Nazirliyinin maddi dəstəyilə gerçəkləşib. Builki kitab bayramı Azərbaycan Xalq Cümhuriyyətinin 91, Yazıçılar Birliyinin 75, Cəlil Məmmədquluzadənin 140 illiyinə, eləcə də Bakının İslam Mədəniyyətinin Paytaxtı elan edilməsinə həsr olunub.

Rəsmi açılış mərasimində çıxış edən YYSQ-nin sədri Aydın Xan, Milli Kitabxananın direktoru Kərim Tahirov, AYB-nin katibi Rəşad Məcid, şair Çingiz Əlioğlu, Gənclər və İdman, Mədəniyyət və Turizm nazirliklərinin nümayəndələri kitab bayramının təşkil olunmasının əhəmiyyətindən danışıblar. Çıxışlarda kitaba marağın artırılması naminə belə tədbirlərin ardıcıl keçirilməsinin vacibliyi diqqətə çatdırılıb.

Kitab Bayramı çərçivəsində Milli Kitabxanada ümummilli lider Heydər Əliyevə aid ekspozisiya, Türkiyə və Misir Mədəniyyət Mərkəzinin xüsusi stendləri, uşaq ədəbiyyatına, elektron nəşrlərə, Qarabağa və başqa mövzulara dair xüsusi guşələr açılıb.

Mükafat Komissiyası 300-dən artıq ədəbi-mədəni və nəşr layihələrinin sırasından 25 işi seçərək, müxtəlif nominasiyalar üzrə qalib elan edib. Ötən ilin bədii-sənədli kitabı nominasiyası üzrə millət vəkili, yazıçı-publisist Elmira Axundovanın "Heydər Əliyev. Şəxsiyyət və zaman" çoxcildliyi qalib seçilib. Vaqif Bayatlı Odərin "Yupyumru bir eşq ilə" 2008-ci ilin poeziya kitabı, yazıçı-publisist Yunus Oğuzun "Nadir şah"ı ilin tarixi romanı elan olunub. Etibar Sturvinin "Stur haqqında kitab"ı ilin etnoqrafik nəşri, professor Tariyel Məmmədovun "Azərbaycan klassik aşıq havaları" antologiyası ilin musiqi nəşri, "Həyat bilgisi" ilin dərslik kitabı adını qazanıb. Şairə-publisisit Zərəngiz Dəmirçi ilin qadın şairi, şair Oqtay Rzanın "Baldan şirin balalar"ı ilin uşaq şeirləri kitabı kimi fərqləndirilib.

Beşik" nəşriyyatının "Mən və mənim dünyam" seriyasından olan uşaq nəşrləri, filoloq-tədqiqatçı Təranə Rəhimlinin "Ədəbiyyat və tənqidin yaradıcılıq problemləri, "Birlik" və "İrfan" ədəbi-mədəni dərgiləri də müvafiq nominasiyalar üzrə qalib sayılıb. 2008-ci ilin yeni nəsil yazarı şair-tərcüməçi Əkbər Qoşalı, gənc yazarı isə şair-jurnalist Fərid Hüseyn olub. M.F.Axundov adına Milli Kitabxana, "Adiloğlu", "Şirvannəşr", "Mütərcim", "Min bir mahnı" nəşriyyatları fəxri fərmanlara layiq görülüblər. Fəxri fərman alanlar sırasında Azərbaycan kitabını təbliğ etdiyinə görə "Space" teleradio şirkətinin "Mədəniyyət saatı" verilişi də var.

S.MÜRVƏTQIZI

525-ci qəzet.- 2009.- 27 may.- S.7.